ەفيوپيانى سوڭعى جارتى عاسىردا بولماعان قۋاڭشىلىق جايلاپ تۇر
وسى رەتتە جەرگىلىكتى بيلىك حالىقارالىق قاۋىمداستىقتان كومەك سۇراپ وتىر، دەپ حابارلادى www.24.kz.
ويتكەنى ەلدەگى ازىق- تۇلىك قورى 1 -مامىرعا دەيىن تاۋسىلۋى مۇمكىن. ەفيوپيا حالقى سوڭعى جارتى عاسىردا بولماعان الاپات قۋاڭشىلىقتىڭ ازابىن تارتىپ وتىر. ماماندار «بارىنە «ەل- نينو» سەبەپ» دەيدى. تىنىق مۇحيتىنىڭ ەكۆاتورلىق بولىگىندە تەمپەراتۋرا اۋىتقىپ، سونىڭ سالدارىنان 10 ميلليوننان استام تۇرعىن اشتىقتىڭ قۇربانىنا اينالعالى تۇر. وتكەن جىلدان بەرى جارىتىپ اس ىشپەي جۇرگەن حالىق سانى 3 ەسەگە ارتىپتى.
«ەفيوپيانىڭ كەيبىر اۋداندارىندا جاڭبىر جاۋماعانىنا 1 جىل بولدى. بۇل جاعداي اۋىل شارۋاشىلىعى سالاسىنا كەسىرىن تيگىزىپ وتىر. سونىمەن قاتار، اۋىزسۋ ماسەلەسى دە وتكىر تۇر»، - دەيدى ب ۇ ۇ وكىلى: پول حەندلي.
ەلدىڭ شىعىس بولىگىندە مال جاپپاي قىرىلىپ جاتىر. ەگىس القاپتارى دا قۋراپ قالعان. سونىڭ سالدارىنان 7,5 ميلليون فەرمەر شۇعىل كومەككە ءزارۋ. بۇگىنگى تاڭدا ەفيوپيادا 5 جاسقا دەيىنگى 450 مىڭ بالا اسقا جارىماي ءجۇر. اشتىقپەن قاتار ەلدە ءتۇرلى اۋرۋلار تاراي ما دەگەن دە قاۋىپ بار. ويتكەنى، ءشول قىسقان حالىق تىرشىلىك ءنارىن مال سۋارىلاتىن لاس سۋقويمالارىنان الىپ ىشۋگە ءماجبۇر.
فوتو:dymontiger.livejournal.com
