ءبىزدىڭ اتا- بابالارىمىز ەشكىمنىڭ جەرىن تارتىپ العان جوق

استانا. قازاقپارات - قازاقتىڭ بيلەرى، باتىرلارى، حاندارى تۋرالى ەلباسى نۇرسۇلتان نازاربايەۆ «قازاق تاريحىندا قازاق ۇيالاتىن ەشتەڭە جوق» دەپ قالاي جاقسى ايتتى! ءبىز ەش ۋاقىتتا ەشكىمنىڭ جەرىن تارتىپ الۋعا، باسىپ الۋعا ۇمتىلعان ەمەسپىز.

 ءوز جەرىمىزدىڭ بايلىعى وزىمىزگە جەتەدى. ءبىزدىڭ اتا- بابالارىمىز ەرلىك جاسادى. ەشكىمنىڭ جەرىن تارتىپ العان جوق. 5-7 مىڭ جىل بويى ءبىز ءوز جەرىمىز بەن ەلىمىزدە اتا- بابالارىمىزدىڭ ارقاسىندا تۇرىپ جاتىرمىز.

كەڭەس زامانىندا ورىستىڭ پاتشالارىن، گەنەرالدارىن بىزگە قالاي كورسەتتى؟ ودان اسقان ادام جوق، ودان اقىلدى جان جوق، بارلىعى دانىشپان. ال، قازاقتىڭ حانى، ءبيى، سۇلتانى مەن باتىرىنا كەلگەندە ءبارى جەمقور، حالىقتى قاناۋشى دەپ ۇيرەتتى. سوسىن، ءبىز 300  جىل رەسەيدىڭ بودانىندا بولعان ەلمىز. 300  جىلدا رەسەي قازاق حالقىنا نە ىستەدى؟ ولار قازاقتىڭ جارتىسىن اشتان قىردى. ەكى يمپەريا 300  جىلدا قازاقستاندا نە ىستەدى، ال، تاۋەلسىزدىكتىڭ 25  جىلىندا ەلىمىزدە نە ىستەلدى؟ ايىرماشىلىعى جەر مەن كوكتەي. بوداندىق داۋىردە بايلىعىمىز نە قولىمىزعا، نە اۋزىمىزعا جەتپەدى. وسىنى تۇسىنە ءبىلۋ كەرەك. ەگەمەندىكتىڭ قادىرىن بارىنشا ۇعىنۋ قاجەت. قۇداي قازاققا ب ا ق بەرگەن، بايلىق بەرگەن.

ءبىزدىڭ ۇرپاق وسى جەرگە يەلىك جاساپ، سايرانداپ جۇرسە ەكەن دەيمىن. ول ءۇشىن بۇل جەردىڭ بايلىعى دا، كەڭدىگى دە، ءبارى دە جەتەدى. تەك سونى ۇقساتا ءبىلۋ كەرەك. ول ءۇشىن قازاق حالقىنا نە كەرەك؟ ءبىرىنشى - ءبىلىم، ەكىنشى - ەڭبەك كەرەك. وسى ەكى نارسە قازاقتى تابىسقا كەنەلتەدى. لايىم تۋعان حالقىم ءارقاشان ساۋ- سالامات بولسىن دەپ تىلەيمىن.

ورازاق سماعۇلوۆ، اكادەميك.

«مادەني مۇرا» جورنالى ءۇشىن بەرگەن سۇحباتىنان ءۇزىندى