كوكشەتاۋدا قايتىس بولعان ادامنىڭ مۇشەلەرى تۇڭعىش رەت دونورلىققا بەرىلدى

كوكشەتاۋ. قازاقپارات - كوكشەتاۋدا تۇڭعىش رەت قايتىس بولعان ادامنىڭ مۇشەسى دونورلىققا بەرىلدى.

بۇل تۋرالى حاباردى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتى فەيسبۋك الەۋمەتتىك جەلىسىندە جاريالادى.

اقمولا وبلىسى بويىنشا وڭىرلىك ترانسپلانتولوگ تالعات حايداروۆتىڭ ايتۋىنشا 60 جاستاعى كوكشەتاۋلىقتىڭ جۇرەگى، باۋىرى جانە بۇيرەگى استانا قالاسىنداعى رەسپۋبليكالىق ورتالىقتاعى ءتورت ادامعا سالىندى.

«ناۋقاس وتە اۋىر جاعدايدا اقمولا وبلىستىق اۋرۋحاناسىنا ءتۇستى. ينسۋلتتىڭ ناتيجەسىندە ونىڭ ءومىرىن ساقتاپ قالۋ مۇمكىن بولمادى»، - دەيدى تالعات حايداروۆ «كەيىن مارقۇمنىڭ تۋىستارىنىڭ كەلىسىمىمەن ونىڭ ورگاندارى الىندى. اعىمداعى جىلدىڭ 21 -ناۋرىزىندا استانادان ترانسپلانتولوگ ماماندار كەلىپ، ورگانداردى الىپ كەتتى. ءبىر تاۋلىكتىڭ ىشىندە بۇل ورگاندار مۇقتاج 4 قازاقستاندىققا سالىندى».

اۆتور: اسلان وسپانوۆ