الماتىدا «التىن ساقا» بالالار سپەكتاكلدەرىنىڭ فەستيۆالى اشىلدى - فوتو

الماتى. قازاقپارات - بۇگىن الماتىدا ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا تۇڭعىش رەت ۇيىمداستىرىلىپ وتىرعان «التىن ساقا» اتتى بالالار سپەكتاكلدەرى فەستيۆالىنىڭ اشىلۋىنا وراي، باسپا ءسوز ءماسليحاتى وتكىزىلدى.

وندا تەاتر باسشىلىعى اتالمىش ءىس- شارانىڭ قىر- سىرىنا توقتالدى.

«بۇل - ەل تەاترى تاريحىندا بالالارعا ارنالعان تۇڭعىش فەستيۆال. بۇل ىشكى فەستيۆال بولعاندىقتان، كورەرمەن نازارىنا ءبىزدىڭ تەاتردا قويىلىپ جۇرگەن سپەكتاكلدەر كورسەتىلەدى. فەستيۆالدى ۇيىمداستىرۋداعى باستى ماقسات - اكتەرلاردىڭ شەبەرلىگىن شىڭداۋ جانە ەرتەگىلەرگە نەگىزدەلگەن تەاتر قويىلىمدارى ارقىلى جاس كورەرمەندەردى ۇلتتىق رۋحتا پاتريوتتىق تاربيە بەرۋگە كۇش سالۋ»، - دەدى ءوز سوزىندە ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ديرەكتورى ءسابيت ءابدىقالىقوۆ.

سونىمەن قاتار، ول فەستيۆال اياسىندا ءار ءتۇرلى اتالىمدار بويىنشا جۇلدەلەر تاعايىندالعاندىعىن جەتكىزدى.

 «جوسپار بويىنشا فەستيۆالدى رەسپۋبليكالىق دەڭگەيدە ۇيىمداستىرۋ كوزدەلگەن ەدى. ءبىراق، قارجى داعدارىسىنا بايلانىستى ول جۇزەگە اسپادى. ءبىراق، ءبىز «اقشا جوق» دەپ قاراپ وتىرماي، ىشكى قارجىمىزدان جۇلدەلەر تاعايىندادىق. جالپى، جۇلدە قورى - 700 مىڭ تەڭگەنى قۇرادى. ءار اتالىمعا 50-100 مىڭ تەڭگە كولەمىندە اقشالاي سىياقىلار قاراستىرىلدى. بولاشاقتا بۇدان دا كولەمدى بولادى دەگەن ۇمىتتەمىز»، - دەدى س. ءابدىحالىقوۆ.

بۇل فەستيۆالدە ءبايدىلدا قالتايەۆ اتىنداعى «ەڭ ۇزدىك ەر ادام بەينەسى ءۇشىن»، اققاعاز مامبەتوۆا اتىنداعى «ەڭ ۇزدىك ايەل بەينەسى ءۇشىن»، قاسىم جاكىبايەۆ اتىنداعى «ەڭ ۇزدىك قوسالقى رولدەگى ەر ادام بەينەسى ءۇشىن»، ءامينا ءومىرزاقوۆا اتىنداعى «ەڭ ۇزدىك قوسالقى رولدەگى ايەل بەينەسى ءۇشىن»، «ەڭ ۇزدىك ەپيزودتىق ءرول»، «ەپيزودتىق رولدەگى اكتەرلىق شەبەرلىگى ءۇشىن»، «كورەرمەندەر كوزايىمى»، «ەڭ ۇزدىك دەبيۋت» اتالىمدارى قاراستىرىلعان. ماراپاتتاۋ ءراسىمى 27 - ناۋرىزدا، ياعني حالىقارالىق تەاتر كۇنى وتكىزىلەدى.

 ايتا كەتەلىك، فەستيۆال اياسىندا 24 - ناۋرىز كۇنى ساعات 11:00-دە - «ناۋرىز دۋمان»، ساعات 13:30-دا - «ەر كوجەك»، 15:30-دا - «التىن ءمۇيىزدى كيىك»، 25 - ناۋرىز كۇنى ساعات 11:00-دە - «تومپاقپەن كەلگەن جاڭا جىل»، ساعات 14:00-دە - «ماۋگلي» جانە 26 - ناۋرىز كۇنى ساعات 11:00-دە - «باتىل كوجەكتەر»، ساعات 14:00-دە «الدار كوسە» سپەكتاكلددەرىن كورسەتۋ جوسپارلانعان.