جانقوش تۇراروۆ: قانات يسلام ەكەۋمىز بىرگە جاتتىعىپ ءجۇرمىز
18 كەزدەسۋىنىڭ بارىندە جەڭگەن سپورتشى ا ق ش- قا نە ءۇشىن كەتكەنىن دە ايتتى دەپ حابارلايدى «ازاتتىق».
1990-جىلى الماتى وبلىسى ىلە اۋدانى كازتسيك اۋىلىندا تۋعان جانقوش تۇراروۆ 2004-جىلدان باستاپ بوكسپەن اينالىسا باستاعان.
«اۋىلدا بالا كەزدەن توبەلەسكە اۋەس بولدىم. اۋىلدىڭ قاي جەرىندە توبەلەس بولسا، سول جەردە مەن جۇرەتىنمىن. مەكتەپتە دە ءبىرىنشى اتامان بولدىم. كەيىن اكەم بوكس سەكسياسىنا اپارىپ، ساعاتبەك مۇستاحانوۆ اعاعا تاپسىردى. سپورتتاعى فۋندامەنتىمدى قالاعان - سول كىسى. ساباقتان گورى جاتتىعۋعا بارعاندى قالايتىنمىن. ايلاپ ساباققا بارماعان كەزدەرىم دە بولعان»، - دەيدى بوكسشى.
جانقوش تۇراروۆ اۋىلىندا جۇرگەنىندە اۋەسقوي بوكس جارىستارىنا قاتىسىپ، ءبىردى-ەكىلى جارىستا عانا مەدال العانىن، كوپ جەڭىسكە جەتە الماعانىن ايتادى.
«اۋەسقوي بوكسقا قاتىسقان جارىستاردا جەڭىس از بولدى. ەل ىشىندەگى جانە حالىقارالىق جارىستاردا فينالعا شىعا الماي قاتتى قينالعان كەزدەر دە بولدى. كەيىن اعالارىمنىڭ كەڭەسىمەن كاسىپقوي بوكسقا اۋىسىپ كەتتىم»، - دەيدى بوكسشى.
18 سايىستىڭ 13 ءىن ۋاقىتىنان بۇرىن اياقتاعان
جانقوش تۇراروۆ 2008-جىلى الماتىعا كەلىپ، كاسىپقوي بوكستىڭ قىر-سىرىن مەڭگەرە باستايدى. ول كاسىپقوي بوكستاعى العاشقى جەكپە-جەگىن 2009-جىلى وتكىزىپ، قارسىلاسىن جەڭگەن.
«2012-جىلى كاسىپقوي بوكستان قازاقستان چەمپيونى اتاندىم. وعان دەيىن نيەۆادا شتاتىندا ءبىر-ەكى امەريكالىق بوكشىسىمەن كەزدەستىم. سول جەردە بىرنەشە پروموۋتەر مەنىڭ كەزدەسۋىمدى كورىپ، ا ق ش- قا شاقىردى. 2013-جىلى ماياميگە كەتتىم. قازىر قانات يسلام ەكەۋمىز نەلسون لوپەستىڭ قول استىندا جاتتىعامىز»، - دەيدى بوكسشى «ازاتتىق» تىلشىسىنە.
ول سوۆەت وداعىندا اۋەسقوي بوكسقا كوپ كوڭىل بولىنگەنىن، سونىڭ كەسىرىنەن پوستسوۆەتتىك ەلدەردە كاسىپقوي بوكس دامىماي قالعانىن ايتادى.
«سول سەبەپتى كاسىپقوي بوكسشىلاردىڭ كوبى الەمدى باعىندىرۋ ءۇشىن ا ق ش- قا كەتەدى»، - دەيدى ول.
جانقوش تۇراروۆ كاسىپقوي بوكستاعى كارەراسىندا 66,7 كيلوگرام سالماقتا 18 كەزدەسۋ وتكىزىپ، سونىڭ بارلىعىندا جەڭىسكە جەتكەن. ونىڭ 13 كەزدەسۋىن ۋاقىتىنان بۇرىن اياقتاعان.
وليمپياداعا قاتىسپايمىن
قاڭتاردىڭ 29 ى كۇنى نيۋ-يوركتە برازيليالىق حواكيم كارنەيرومەن 12 راۋندتىق كەزدەسۋ وتكىزىپ، ءبىرىنشى راۋندتا-اق جەڭىسكە جەتكەن جانقوش تۇراروۆ 66,7 كيلوگرام سالماقتا NBA (ۇلتتىق بوكس اسسوتسياتسياسى) بويىنشا الەم چەمپيونى اتاعىن يەلەندى. قازاق سپورتشىسى WBA (الەمدىك بوكس اسسوتسياتسياسى) رەيتينگىندە ءوز سالماعى بويىنشا ۇزدىك 15 بوكسشىنىڭ قاتارىنا ەندى.
«NBA بەلدىگىنىڭ دەڭگەيى جوعارى دەپ ايتا المايمىن. ءبىراق بۇل دا - جەتىستىك. ەندى الەمدەگى ەڭ ۇزدىك WBA مەن WBO (الەمدىك بوكس ۇيىمدارى) تۇجىرىمدارى بويىنشا چەمپيوندىق اتاققا تالاسۋىم كەرەك. قازىرگى كەزدەسۋلەردەن تابىس تاۋىپ كورمەدىم. سەبەبى مەن وتكىزگەن كەزدەسۋلەر تەلەارنادان كورسەتىلمەدى. رەيتينگ كوتەرىپ، ۇزدىك بوكسشىلارمەن كەزدەسۋىم كەرەك. سوندا بوكستان تابىس تابۋعا بولادى»، - دەيدى سپورتشى.
جانقوش تۇراروۆتان AIBA- نىڭ (حالىقارالىق اۋەسقوي بوكس قاۋىمداستىعى) كاسىپقوي بوكسشىلاردى وليمپيادا ويىندارىنا قاتىسۋعا مۇمكىندىك بەرەتىن شەشىمى جايلى پىكىرىن دە سۇرادىق.
«بۇل ماسەلەگە قاتىستى قازىر حالىقارالىق وليمپيادا كوميتەتىنىڭ شەشىمى شىعۋ كەرەك. ءبىراق ولار قانداي شەشىم شىعارسا دا، مەن وليمپياداعا قاتىسپايمىن. بارلىق ماقساتىم - كاسىپقوي بوكستا جەتىستىككە جەتۋ»، - دەيدى ول.
قازىر قازاقستاندا جۇرگەن سپورتشى ءساۋىردىڭ ورتاسىندا 19-كەزدەسۋىن وتكىزۋ ءۇشىن ا ق ش- قا قايتادى. ول پروموۋتەرى نەلسون لوپەستىڭ كومانداسى قارسىلاس سپورتشىنى ىزدەپ جاتقانىن ايتتى. بيىل ءۇش-ءتورت جەكپە-جەك وتكىزبەك جوسپارى بار جانقوش تۇراروۆ «ەندىگى ويىم - 2017-جىلى الەمدىك رەيتينگتە ۇزدىك وندىققا ەنىپ، الەم چەمپيوندىعىنا تالاسۋ» دەيدى.
