ءسابينا التىنبەكوۆا جاپونيادان نە ءۇشىن قايتىپ كەلگەنىن ايتتى
سپورتشى قىز جاپون كلۋبىنىڭ قۇرامىندا 2015 -جىلدىڭ كوكتەمىنەن بەرى جاتتىققانىن، ءبىراق ءبىر جىل وتكەندە قازاقستانعا قايتىپ كەلگەنىن، ءتىپتى ءوز كومانداسىنىڭ ساپىندا ءبىر ويىن وتكىزىپ ۇلگەرگەنىن ايتتى. ايتۋىنشا، ول اۋەلدەن- اق قازاقستانعا ورالۋدى جوسپارلاپتى.
«مەن ول جاقتا ءساتتى جاتتىعۋلار جاسادىم. ءبىرىنشى اپتالاردا، ارينە، بەيىمدەلۋ قيىنداۋ بولدى - اۋا رايى قالىپتى ەمەس، ءبىراق بارلىعى جاقسارىپ كەتتى. جاراقات المادىم. شامامەن 11 اي جاتتىعىپ، جاپوننىڭ GSS Sunbeams كلۋبىندا وينادىم. مەنىڭ ءبىرىنشى ماقساتىم تاجىريبە جيناۋ، كۆاليفيكاتسيا كوتەرۋ بولاتىن. بيىلعى اقپاندا ماۋسىم اياقتالىپ، مەن تاياۋدا قازاقستانعا ورالدىم، باستاپقى «الماتى» كومانداسىنا ورالدىم، بۇل جوسپارلانعان ەدى»، - دەدى التىنبەكوۆا. ايتا كەتەيىك، ول قازاقستاندا وسكەمەندە ءوتىپ جاتقان ەل چەمپيوناتىنىڭ بەسىنشى تۋرىندا وينادى.
«ايتقىم كەلگەنى، ماعان جاپون كلۋبى قاتتى ۇنادى - ولار وتە كاسىپقوي، بىرلىگى بار كوماندا. قازاقستان مەن جاپونياداعى ۆولەيبولدىڭ دەڭگەيى بىردەي ەمەس. كوماندالاستارىممەن، باپكەرىممەن ءالى دە بايلانىس ۇزىلمەيدى»، - دەپ اتاپ ءوتتى ول.
ۆولەيبولشى الداعى جوسپارىن ايتتى. ايتۋىنشا، ول ارمەن قاراي دا "الماتى" كلۋبىندا جاتتىعىپ، ويناي بەرمەك ءارى سپورتشى رەتىندە وسۋگە نيەتتى. التىنبەكوۆا ءالى دە ۇلتتىق قۇراما ساپىنا كىرۋدى جوسپارلاپ وتىر ەكەن، ءبىراق ول بۇل ماقساتقا جەتۋ ءۇشىن ءبىر جىلدىق ەڭبەك جەتكىلىكسىز.
«ايەلدەر اراسىنداعى ۇلتتىق قۇرامادا جاقسى، تاجىريبەلى ويىنشىلار بار. ول جاققا بارۋعا ەرتە. مۇنداي جاستا ۇلتتىق قۇراماعا كىرۋ سيرەك كەزدەسەدى. ءبىراق مەن تىرىسامىن، جاتتىعامىن، وينايمىن. قۇراماعا كىرەمىن دەپ ۇمىتتەنەمىن، ءبىراق بيىل دا ەمەس، الداعى جىلدا دا ەمەس»، - دەدى 19 جاستاعى ۆولبەيبولشى.
ەسكە سالايىق، ءسابينا التىنبەكوۆا 2014 -جىلى جاستار اراسىنداعى ازيا چەمپيوناتىندا تانىمال بولعان ەدى. قىتاي تىلشىلەرى قازاقستاندىقتىڭ ويىنىنا ەمەس، سىرتقى كەلبەتىنە نازار اۋداردى. بىرنەشە كۇننىڭ ىشىندە التىنبەكوۆانىڭ بۇكىل ازيا بويىنشا جانكۇيەرلەرى پايدا بولدى. Instagram جەلىسىندە ونى 500 مىڭ ادام قاداعالاپ وتىرادى. الايدا ۆولەيبولشى وزگەلەردىڭ ونى سپورتشى دەپ ءبىلۋىن قالايدى.
