پىلدەردىڭ دە موينىنا ەلەكتروندىق قارعىباۋ تاعىلا باستادى
سونىمەن قاتار تاياۋ ارادا ايماقتا باستالاتىن قۇرىلىس جۇمىستارىنىڭ ءسۇت قورەكتىلەرگە تيگىزەتىن اسەرى دە تەكسەرىلمەكشى.
كەنيا عالىمدارى بۇل باستامانى بەكەردەن بەكەر كوتەرىپ وتىرعان جوق. ويتكەنى 1940-جىلدارى ەلدە مەكەن ەتكەن 45 مىڭ ءپىلدىڭ قازىرگى سانى 11 مىڭعا جەتە مە، جەتپەي مە؟! سوندىقتان ماماندار ءىرى ينفراقۇرىلىمدىق جوبالاردىڭ جانۋارلارعا تيگىزەتىن كەرى اسەرىن بارىنشا ازايتۋعا تىرىسىپ كەلەدى، دەپ حابارلايدى 24.kz.
«پىلدەردى قۇتقارىڭىز!» ۇيىمىنىڭ وكىلى فرەنك پوۋپتىڭ ايتۋىنشا، الىپ جانۋارلاردىڭ موينىنا ەلەكتروندىق قۇرىلعى تاعىپ، ولاردىڭ جۇيرىك پويىزعا ارنالعان تەمىر جول قۇرىلىسىنا قالاي ارەكەت ەتەتىنىن بىلۋگە بولادى. ويتكەنى شويىن جول ءسۇت قورەكتىلەر مەكەن ەتەتىن تساۆو ۇلتتىق ساياباعىنىڭ شىعىسى مەن باتىس بولىگىندە جاتىر.
2013-جىلى كەنيا مەن قىتاي اراسىندا ەكونوميكالىق ىنتىماقتاستىق تۋرالى كەلىسىمگە قول قويىلعان. بۇل جوبا سول مامىلە اياسىندا جۇزەگە اسىرىلماق. تەمىر جول شىعىس افريكاداعى ساۋدا-ساتتىقتى دامىتۋعا ءوز سەپتىگىن تيگىزۋى ءتيىس. وسى رەتتە ءتىرى تابيعات تۋرالى دا ۇمىتپاعان ءجون دەيدى ەكولوگتار. - ەلدىڭ دامۋى ءۇشىن قالالار اراسىنداعى قاتىناستى جەڭىلدەتىپ، تاۋارلار تاسىمالىن ىڭعايلى ەتۋ جاقسى، ارينە. الايدا جانۋارلار مەن وسىمدىكتەر الەمىن دە نازاردان تىس قالدىرماۋىمىز كەرەك، دەيدى ەكولوگ بەنسون وكيتا.
جالپى كەنيالىق پىلدەردىڭ موينىنا بۇعان دەيىن دە ەلەكتروندىق قارعىباۋ تاعىلعان. ولارعا ارنايى Sim كارتا ورناتىلدى. ول كەزدە بۇل ەگىس القاپتارىن جانۋارلاردان قورعاپ قالۋ ءۇشىن جاسالىپ ەدى. ياعني ءسۇت قورەكتىلەر تاياپ قالعاندا ورتالىق سەرۆەرگە حابارلاما تۇسەدى. ارتىنشا ەگىسكە ارنايى ماماندار توبى شۇعىل جەتىپ، پىلدەردى قۋىپ شىعادى ەكەن.
