جەتىسۋلىقتار ناۋرىز كۇنى ۇلتتىڭ داستۇرلەرىن جاڭعىرتتى - فوتو
قالا ورتالىعىندا ەل تاۋەلسىزدىگىنىڭ 25 جىلدىعىنا وراي مەرەكەگە ارناپ 25 كيىز ءۇي تىگىلدى. ناۋرىز مەرەكەسى «تاۋەلسىز تاڭنىڭ نۇرلى ناۋرىزى» دەگەن تاقىرىپپەن ءوتتى، دەپ حابارلايدى الماتى وبلىسى اكىمدىگىنىڭ باسپا ءسوز قىزمەتى.
وبلىس اكىمى اماندىق باتالوۆ باستاپ الدىمەن «بۇلاقتىڭ كوزىن اشۋ» ءراسىمىن اتقاردى. مۇنان سوڭ قونايەۆ كوشەسىنىڭ بويىندا تىگىلگەن اقشاڭقان كيىز ۇيلەردىڭ الدىندا ءوتىپ جاتقان توي- دۋماندى تاماشالادى. «ناۋرىز تىلەكتەر» ايتىلىپ، قازاق حالقىنىڭ سالت- داستۇرلەرىنەن كورىنىستەر كورسەتىلدى. ناۋرىز ايتىس ۇيىمداستىرىلىپ، تال وتىرعىزۋ ءراسىمى جاسالدى. ناۋرىز تاعامدارى رەتىندە باۋىرساق، ناۋرىز كوجە، قازاقشا ەت، ۇلتتىق تاعامدار ۇسىنىلدى.
ناۋرىز تويى جاقىندا بوي كوتەرگەن «جاستار» مادەني- دەمالىس ساياباعىنىڭ ىشىندە «قاسيەتتى حالىق تويى - نۇرلى ناۋرىز» اتتى تەاترلاندىرىلعان كورىنىستەرمەن جالعاسىپ، تابيعاتتىڭ ويانۋى، الاستاۋ ءراسىمى، شاشۋ، باسقا دا داستۇرلەر كورسەتىلدى.
جينالعان جۇرتشىلىقتى مەرەكەمەن قۇتتىقتاعان وبلىس اكىمى ا. باتالوۆ:
- ۇلىستىڭ ۇلى كۇنى، بەرەكە مەن بىرلىكتىڭ باستاۋى، جىل باسى - ناۋرىز قۇتتى بولسىن! قازىرگى ۋاقىتتا ناۋرىز جاڭا سيپاتقا يە بولدى. ۇلتىنا، ءدىني سەنىمىنە قاراماستان قازاقستاندى مەكەندەيتىن بارلىق ۇلتتار مەن ۇلىستاردىڭ ورتاق مەرەكەسىنە اينالدى. الدىمىزدا ۇلكەن اسۋلار، ۇلكەن بەلەستەر تۇر. مەشىن جىلى ەلباسىمىزدىڭ باسشىلىعىمەن ەلىمىز ءۇشىن قازىنالى، مەرەكەلى، بەرەكەلى جىل بولسىن! - دەدى.
قۇتتىقتاۋ تىلەگىنەن كەيىن وبلىس باسشىسى «ناۋرىز ارۋى» بايقاۋىنىڭ جەڭىمپازدارىن ماراپاتتادى. مەرەكە كونسەرتتىك باعدارلامامەن جالعاسىپ، قازاقستان ەستراداسىنىڭ تانىمال توپتارى مەن انشىلەرى «ارناۋ» دۋەتى، ميراس پەن قۇرالاي، كامشات جولدىبايەۆا، سونىمەن قاتار ءسۇيىنباي اتىنداعى وبلىستىق فيلارمونيا مەن «تالدىقورعان اۋەندەرى» فولكلورلىق- ەتنوگرافيالىق ءانسامبلىنىڭ ونەرپازدارى ونەر كورسەتتى.
وسى كۇنى تالدىقورعان قالاسىنىڭ اباي كوشەسىندە ءتۇرلى سپورتتىق ويىندار ۇيىمداستىرىلىپ، بالالار كوركەمسۋرەت مەكتەبى وقۋشىلارىنىڭ سۋرەتتەرى كورمەگە قويىلدى.
ناۋرىز- دۋماندى وبلىس اكىمى ا. باتالوۆپەن تالدىقورعانعا ارنايى كەلگەن رەسپۋبليكالىق بۇقارالىق اقپارات قۇرالدارىنىڭ باسشىلارى دا بىرگە تاماشالادى.
كەشكىلىك مەرەكە جاستارعا ارنالعان بي كەشىمەن جالعاستى.
