بەيجىڭدە قىتايداعى قازاق دياسپوراسى ناۋرىزدى مەرەكەلىك كونسەرتپەن قارسى الدى - كەسكىن، فوتو
قوناقتاردىڭ اراسىندا ق ح ر- داعى ق ر ەلشىلىگىنىڭ ديپلوماتتارى، سونداي- اق اسپاناستى ەلىنىڭ استاناسىنا جەكە ىستەرىمەن بارعان قازاقستاندىقتار بولدى.
«ناۋرىز مەرەكەسى قازاق حالقى ءۇشىن ءداستۇرلى مەيرام. جاڭا جىلدا بارلىعىنا تابىس، جاڭا جەتىستىكتەر تىلەيمىن!»، - دەدى بەلگىلى جازۋشى، قىتايدىڭ حالىقتىق ساياسي كونسۋلتاتيۆتى كەڭەسىنىڭ مۇشەسى اكبار ءماجيت.
شىنجاڭ- ۇيعىر اۆتونوميالىق ولكەسى ىلە- قازاق اۆتونوميالىق اۋدانى تارباعاتاي وكرۋگىنىڭ حالىقتىق ساياسي كونسۋلتاتيۆتى كەڭەسىنىڭ ءتوراعاسى كارىم دۇيسەنباي ۇلى قوناقتارعا سالەمىن جولدادى.
«ەلىمىزدىڭ استاناسىندا العاش رەت ناۋرىزدى تويلاپ وتىرمىن. بۇگىن سىزدەردىڭ بەيجىڭدە ءداستۇرلى مەرەكەمىزدى تويلاپ جاتقاندارىڭىزعا 35 جىل بولدى. ەرتە كەزدەردە ءبىز ونى تەك تۋعان ولكەدە تويلايتىنبىز»، - دەدى ول.
قوناقتار الدىندا قىتاي ۇلتتارى ورتالىق ۋنيۆەرسيتەتى جانىنداعى مۋزىكا ينستيتۋتىنىڭ، قىتاي مۋزىكا جانە بي اكادەمياسىنىڭ ستۋدەنتتەرى، دومبىراشى نىعمەت ءابدىراحمان ۇلى (تەرمە «اڭشىنىڭ ارمانى»)، قىتاي ورتالىق حالىقتىق راديوسىنىڭ ديكتورى، ءانشى ارداق عابيدەن قىزى («تەربەلەدى تىڭ دالا»)، ىلە- قازاق اۆتونوميالىق اۋدانى ءان جانە بي ءانسامبلىنىڭ ءارتىسى ءادىل ءابىلقاسىم ۇلى («شىن ءسۇيۋ»)، شىنجاڭ- ۇيعىر اۆتونوميالىق ولكەسى بوروتولا- موڭعول اۆتونوميالىق وبلىسى سزينحە ۋەزىنىڭ مۋزىكانتى سەرىكباي شالاباي ۇلى («جايلاۋىم») جانە ت. ب ونەر كورسەتتى.
كەش ق ح ر- داعى ق ر ەلشىلىگىنىڭ ءبىرىنشى حاتشىسى تيمۋر تارىبايەۆتىڭ ورىنداۋىنداعى باتىرحان شۇكەنوۆتىڭ «وتان انا» انىمەن اياقتالدى.
«ءبىز قازاقستاننىڭ جەتىستىكتەرىنە قۋانامىز. قازاقتىڭ شىعارماشىلىق زيالى قاۋىمىمەن ارالاسقاندى قالايمىز. بۇرىن روزا رىمبايەۆا، ماقپال ءجۇنىسوۆا، نۇرلان ونەربايەۆ جانە ت. ب ارتىستەر كەلەتىن. وسىنداي كونسەرتتەر الداعى ۋاقىتتا دا بولسا ەكەن دەيمىز»، - دەدى قازاقستاندىق جۋرناليستەرگە بەرگەن سۇحباتىندا قىتاي ورتالىق حالىقتىق راديوسىنىڭ ديكتورى، ءانشى ارداق عابيدەن قىزى.
