ورالدا ءتارتىپ ساقشىلارى ناۋرىز مەيرامىن تويلادى - فوتو

ورال. قازاقپارات - ۇلىستىڭ ۇلى كۇنىنە وراي باتىس قازاقستان وبلىسىنىڭ ىشكى ىستەر دەپارتامەنتىندە «ارمىسىڭ، ءاز- ناۋرىز!» اتتى مەرەكەلىك شارا وتكىزىلدى.

دەپارتامەنتتىڭ باسپا ءسوز قىزمەتىنەن تۇسكەن مالىمەتكە قاراعاندا، ءداستۇرلى شاراعا بارلىق پوليتسەيلەر اتسالىسىپ، توپ- توپقا ءبولىنىپ، ءوز ونەرلەرىن ورتاعا سالدى. ناۋرىز مەيرامىنا وراي ارنايى داستارحان ازىرلەنىپ، ۇلتتىق كيىم كيگەن دەپارتامەنت قىزمەتكەرلەرى مەرەكەلىك باعدارلاما قويدى. كونسەرت بارىسىندا ونەرپازدار قازاق اندەرىن دومبىرانىڭ سۇيەمەلدەۋىمەن شىرقاسا، ارقان تارتۋ، ساقينا سالۋ سەكىلدى ۇلتتىق ويىندار كەش اجارىن اشا ءتۇستى. مەرەكەلىك داستارحاننان ناۋرىز كوجە، اس، قىمىز، قۇرت، قايماق، قازى- قارتا، جال- جايا سەكىلدى ءدامدى تاعامدار ورىن الىپ، ۇلتتىق ويۋلارمەن ورنەكتەلدى.

دەپارتامەنت باسشىلىعىنان قۇرالعان قازىلار القاسى ءار توپقا باعاسىن بەرىپ وتىردى.

دەپارتامەنت باستىعىنىڭ ورىنباسارى، پوليتسيا پولكوۆنيگى بەرىك وتەۋلين مەرەكەمەن قۇتتىقتاپ، يگى تىلەگىن جەتكىزدى.

سايىس سوڭىندا ۇلتتىق سالت- داستۇرلەردى ناسيحاتتاۋعا قوسقان ۇلەستەرى ءۇشىن ءار توپ «ۇزدىك داستارحان ءمازىرى، «ۇزدىك ناۋرىز كوجە»، «ۇزدىك ۇلتتىق تاعام» سىندى اتالىمدارمەن ماراپاتتالىپ، شاراعا بەلسەنە قاتىسىپ، ونەرلەرىن كورسەتكەن ءبىرقاتار قىزمەتكەرگە العىسحاتتار تابىس ەتىلدى.