اقتوبەلىك ستۋدەنتتەر ناۋرىز ايى بويى ۇلتتىق كيىم كيىپ ءجۇردى
دەپ جازادى وبلىستىق «اقتوبە» گازەتى.
ق. جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى فيلولوگيا فاكۋلتەتىنىڭ قازاق ءتىلى مەن ادەبيەتى ماماندىعىنىڭ 402-توپ ستۋدەنتتەرى ءتورت جىلدان بەرى ناۋرىز ايىندا ۇلتتىق كيىم كيىپ جۇرەدى. ماقسات - ۇلتتىق قۇندىلىقتارىمىزدى ۇلىقتاۋ، وزگەلەرگە ۇلگى بولۋ.
«بابامىزدان جەتكەن اسىل قازىنالارىمىزدىڭ قاسيەتىن جوعالتپاي، ۇرپاقتان- ۇرپاققا ۇلىقتاۋ - ءبىزدىڭ مىندەتىمىز. سوندىقتان زاماناۋي تاريحپەن قاتار دامىپ كەلە جاتقان ۇلتتىق كيىمدەرىمىزدى ۇلىقتاۋدى ءتورت جىلدان بەرى داستۇرگە اينالدىرىپ كەلەمىز. بۇل - توپ جەتەكشىمىز ساقىپجامال تاشىمبايەۆانىڭ باستاماسىمەن جۇزەگە اسىرىلعان شارا»، - دەيدى توپ ستاروستاسى ايبات ومىربايەۆ.
قازىر ۋنيۆەرسيتەتتە ستۋدەنت قىز- جىگىتتەر ۇستەرىنە جاڭا ۇلگىدەگى كامزول، ويۋ تۇسكەن كوستيۋم كيىپ ءجۇر. وسىدان ءتورت جىل بۇرىن ولار ۇلتتىق كيىمدەردى قالاداعى اتەلەلەردىڭ بىرىنە ارنايى تاپسىرىسپەن تىكتىرتكەن.
«ءبىزدىڭ توپتاعى قىز- جىگىتتەر ۇلتتىق كيىمدى 1-31 - ناۋرىز ارالىعىندا ساباق كەزىندە كيەدى. ارينە، باستاپقى كەزدە بۇل ىسىمىزگە توسىرقاي قاراعاندار كوپ بولدى. كەيىن كوپشىلىكتىڭ كوزىن ۇيرەتتىك. ۇلكەندەر جاعى ءتىپتى ريزاشىلىقتارىن ءبىلدىرىپ جاتادى. ۋنيۆەرسيتەتىمىزگە سىرتتان قوناقتار كوپ كەلەدى. شەتەلدىكتەردى دە ءجيى كەزدەستىرەمىز. سوندىقتان ۇلتتىق قۇندىلىقتارىمىزدى ءتيىستى دەڭگەيدە جارنامالاپ، ناسيحاتتاپ وتىرۋىمىز كەرەك»، - دەيدى ايبات.
ولار ۇلتتىق كيىمدەردى ۇلىقتاۋمەن قاتار، ناۋرىز مەرەكەسىن ەرەكشە اتاپ وتۋگە ءمان بەرەدى. قىز- جىگىتتەر بيىل دا قازان كوتەرىپتى. ستۋدەنتتەردىڭ قولىمەن ازىرلەنگەن ناۋرىز كوجەدەن كوپشىلىك ءدام تاتقان. ۋنيۆەرسيتەتتەگى ناۋرىز مەرەكەسىنە دە بەلسەنە قاتىسادى.
«بيىل جاستار ۋنيۆەرسيتەتتى ءتامامدايدى. ناۋرىز ايىنىڭ سوڭىندا قىز- جىگىتتەر ءتورت جىل بويى كيگەن ويۋلى كامزولدارىن تومەنگى كۋرس ستۋدەنتتەرىنە سالتاناتتى تۇردە تابىستايدى»، دەپ جازادى اقتوبەنىڭ وبلىستىق باسىلىمى.
