رەجەپ ەردوعان دۇيسەن قاسەيىنوۆ باستاعان تۇركسوي دەلەگاتسياسىن قابىلدادى - فوتو
كەزدەسۋگە تۇركسوي باس حاتشىسى دۇيسەن قاسەيىنوۆ باستاعان رەسمي دەلەگاتسيا مەن ازەربايجان، مولدوۆا، قازاقستان، قىرعىزستان، ماكەدونيا، موڭعوليا، تۇركىمەنستان سىندى ەلدەردەن كەلگەن ونەرپازدار قاتىستى.
سونىمەن قاتار تۇركيا پرەمەر- ءمينيسترىنىڭ ورىنباسارى تۇعرىل تۇركەش، تۇركيانىڭ مادەنيەت ءمينيسترى ماحير ۋنال دا كەزدەسۋگە قاتىستى.
تۇركى جۇرتىن، ۇلىستىڭ ۇلى كۇنى - ءاز- ناۋرىز مەرەكەسىمەن قۇتتىقتاعان تۇركيانىڭ پرەزيدەنتى: «حالىقارالىق تۇركسوي ۇيىمى قۇرىلعان كۇننەن باستاپ، تۇركىتىلدەس حالىقتاردىڭ ونەر مەن مادەنيەتىن دامىتۋعا زور ۇلەس قوسىپ كەلەدى. تۇركى دۇنيەسىندەگى بەيبىت قاتار ءومىر ءسۇرۋ مادەنيەتىنىڭ قالىپتاسۋىندا ەلەۋلى ورىنعا يە. بۇل ۇيىمنىڭ الەمدىك بەدەلى وراسان زور. سوندىقتان تۇركسوي- دىڭ اتقارىپ وتىرعان جۇمىستارىنا ءمان بەرىپ، ۇنەمى قولداۋ كورسەتىپ وتىرامىز.
بيىلعى جىلى ناۋرىز مەيرامىنا ارنالعان مەرەكەلىك شارالاردىڭ جوعارى دەڭگەيدە وتەتىندىگىنە سەنىمدىمىن. ناۋرىز - كوكتەمنىڭ حابارشىسى. تۇركياداعى بۇل كۇن - باۋىرلاردى جانە تۋعان- تۋىستى بىرىكتىرەتىن مەرەكە. تۇركىنى عانا ەمەس، بۇكىل ادامزاتتى بەيبىتشىلىككە شاقىراتىن كۇن. تۇركسوي ۇيىمداستىرىپ وتىرعان مەرەكەلىك ءىس- شارالارى ارقىلى ناۋرىزدىڭ قاسيەتىمەن بىرگە بەيبىت ءومىردىڭ ساعىنىشىن ناسيحاتتاپ كەلەدى. وسىلايشا قۇرلىقتار اراسىنداعى كوپىرلەردى سالىپ، دوستىق قارىم- قاتىناستى كۇشەيتىپ وتىرادى. 28 - ناۋرىز كۇنى بىرىككەن ۇلتتار ۇيىمىندا جانە 1- ساۋىردە ۆاشينگتون قالاسىندا وتەتىن مەرەكەلىك شارانىڭ ءساتتى وتەتىندىگىنە سەنىمىم مول. وسىنداي يگى شارانىڭ باسى- قاسىندا جۇرگەن تۇركسوي باس حاتشىسىنا جانە تۇركسوي- دىڭ جۇمىستارىن قولداپ وتىرعان بارلىق باۋىرلارىمىزعا العىسىم شەكسىز،» - دەپ جۇرەكجاردى تىلەگىن جەتكىزدى.
تۇركسوي باس حاتشىسى دۇيسەن قاسەيىنوۆ تۇركيا پرەزيدەنتىنە العىس ءبىلدىرىپ، يىعىنا شاپان جاپتى.
ەسكە سالا كەتەيىك، قازاقستاننىڭ اتىنان تۇركيانىڭ 20-دان استام قالالارىندا ناۋرىز مەيرامىنا ارنالعان مەرەكەلى شارالارعا «سازگەن سازى» فولكلورلىق- ەتنوگرافيالىق ءانسامبلىنىڭ ونەرپازدارى، «تاراز» تريوسى، «توميريس» حالىق بي ءانسامبلىنىڭ بيشىلەرى، «سامۇرىق» بيشىلەر توبى قاتىسۋدا.
