ورالدا ۇلىستىڭ ۇلى كۇنى مەرەكەلىك شارالارعا تولى بولدى - فوتو
ناۋرىز مەرەكەسىنە وراي تەاترلاندىرىلعان كورىنىستەر كوپشىلىك نازارىنا ۇسىنىلىپ، اسەم ءان اۋەلەپ، كۇمبىرلەگەن كۇي توگىلدى.
جينالعان جۇرتشىلىقتى ۇلىستىڭ ۇلى كۇنىمەن ءوڭىر باسشىسى نۇرلان نوعايەۆ قۇتتىقتاپ، ىزگى تىلەگىن جەتكىزدى. «كۇن مەن ءتۇن تەڭەسىپ، جۋاننىڭ جىڭىشكەرىپ، جىڭىشكەنىڭ ۇزىلەر شاعىندا، مىنە، ناۋرىز مەرەكەسى دە كەلىپ جەتتى. قاھارلى، بوراندى ءارى ايازدى قىستان كەيىن جەردىڭ بەتى ءجىبىپ، مالدىڭ اۋزى كوككە ىلىنەر تۇس. بۇگىن قار جاۋىپ تۇر، بۇل دا جاقسىلىقتىڭ بەلگىسى دەۋگە بولادى. ناۋرىز - بارشا حالقىمىز ءۇشىن ەڭ ۇلىق مەرەكە. بۇل - بىرلىكتىڭ، جاسامپازدىقتىڭ مەرەكەسى. وتكەن عاسىردىڭ جيىرماسىنشى جىلدارى ءدىني مەيرام دەپ تىيىم سالىنعان ناۋرىز سەكسەنىنشى جىلدارى قايتا جانداندى. 1991-جىلى ەلباسى جارلىعىمەن تۇڭعىش رەت مەملەكەتتىك مەيرام رەتىندە اتالىپ ءوتىلدى. سودان بەرى ۇلتىنا، دىنىنە قاراماستان، بارلىق قازاقستان حالقى ناۋرىزدى تويلاپ كەلەدى. ەلىمىزدىڭ ودان ءارى قارىشتاپ دامۋىنا بارلىق جاعداي بار. مەملەكەت باسشىسىنىڭ بەلگىلەگەن رەفورما، بەرگەن تاپسىرمالارىن بارشا قازاقستاندىقتاردىڭ ورىندايتىنىنا كۇمان جوق. بيىل تاۋەلسىزدىگىمىزدىڭ 25 جىلدىعى كەڭىنەن تويلانادى. بۇل دا - ەلىمىز ءۇشىن اسا ەلەۋلى مەرەكە. الدىڭعى بۋىننىڭ اتقارعان ىستەرىن جاس ۇرپاق جالعاستىرا وتىرىپ، العا باسا بەرەتىن بولادى. ۇلتتىق قۇندىلىقتاردى، وزىق سالت- داستۇرلەرىمىزدى ساقتاي وتىرىپ، رۋحىمىز بيىك، تاۋەلسىزدىگىمىز ماڭگىلىك بولۋى ءۇشىن قولدان كەلگەننىڭ ءبارىن جاساۋ ماڭىزدى. ۇلىس وڭ بولسىن، اق مول بولسىن!» ، دەدى اكىم.
ناۋرىز مەيرامىنا وراي دوستىق داڭعىلىندا 25 كيىز ءۇي تىگىلىپ، تۇرعىندارعا تەگىن ءدام ۇسىنىلدى. كورىسۋ ايت، شىلدەحانا، تۇساۋكەسەر، سۇندەت توي، توقىم قاعار سەكىلدى ۇلتتىق سالت-داستۇرلەر كورسەتىلدى. ۇلتتىق سپورت تۇرلەرىنەن وتكەن جارىس تا كەلۋشىلەردى بەي-جاي قالدىرمادى.
ورالعا قاراستى زاشاعان، دەركول، كرۋگلووزەرنىي، سەرەبرياكوۆ، جەلايەۆ كەنتتەرىندە دە مەيرام ءوز دارەجە-دەڭگەيىندە تويلاندى. جالپى، قالادا مەرەكەلىك شارالاردى وتكىزۋگە بيۋدجەتتەن 4 ميلليون تەڭگە ءبولىندى.
