پەتروپاۆلدا ناۋرىزدى مەرەكەلەۋدە «دوستىق داستارحانى» جايىلدى

پەتروپاۆل. قازاقپارات - سولتۇستىك قازاقستان وبلىسىندا ناۋرىز مەيرامىنا ارنالعان مەرەكەلىك شارالار ءوتىپ جاتىر.

پەتروپاۆل قالاسىنىڭ ورتالىق الاڭىندا «ارماندار اعاشى» كومپوزيتسياسى، ەتنواۋىل مەن قولونەر شىعارماشىلىعى كورمەسى ۇيىمداستىرىلدى. بۇل تۋرالى ءوڭىر باسشىسىنىڭ باسپا ءسوز قىزمەتىنەن حابارلادى.

مەرەكەلىك شارادا 21 -ناۋرىزدا س ق و اكىمى ەرىك سۇلتانوۆ بولدى.

قازاقستان حالقى اسسامبلەياسى عيماراتى الدىندا ەتنومادەني بىرلەستىكتەردىڭ وكىلدەرى مەرەكە قوناقتارىنا ۇلتتىق تاعامدار ۇسىنىلعان دوستىق داستارحانىن جايدى.

جاقىن ماڭدا ۇلتتىق شەبەرلەر وزدەرىنىڭ بۇيىمدارى كورمەسىن ۇسىندى. ءوڭىر باسشىسى قولونەر ۇلگىلەرىمەن تانىستى.

ەتنواۋىلدا ەرىك سۇلتانوۆ تەاترلانعان «تۇساۋ كەسۋ» داستۇرىنە قاتىستى.

مەرەكەلىك باعدارلاما كەشكە دەيىن سوزىلدى. كۇنى بويى باۋىرساق جەۋ مەن ەڭ ءدامدى ناۋرىز كوجەنى دايىنداۋ بايقاۋلارى، ۇلتتىق ويىندار مەن سپورتتىق جارىستار وتەدى.

الداعى ەكى كۇندەگى مەرەكەلىك باعدارلامالار دا قىزىقتى بولماق. «باۋىرساق-فەست» اكتسياسى بويىنشا مەيمانداردىڭ الدىندا باۋىرساق پىسىرىلىپ، قوناقتارعا تاراتىلادى. بۇدان باسقا ۇلتتىق كيىمدەر دەفيلەسى, وبلىستىق كيىز ۇيلەر بايقاۋى، وڭىرلىك اقىندار ايتىسى، سونداي-اق، ويىن-ساۋىق جانە وتباسىلىق باعدارلامالار ۇسىنىلادى.