قازاقستان ۇلتتىق قۇراماسى تۇركياعا جول تارتتى

استانا. قازاقپارات - بۇگىن تاڭەرتەڭ قازاقستان ۇلتتىق قۇراماسى تۇركيانىڭ انتاليا قالاسىنا جول تارتتى.

بۇل جاقتا ۇلتتىق قۇراما ءازىربايجان فۋتبولشىلارىمەن جولداستىق ماتچ وتكىزەدى. بۇل تۋرالى ق ف ف باسپا ءسوز قىزمەتى حابارلادى.

قازاقستان پرەمەر-ليگاسىنىڭ ەكىنشى تۋرىنان كەيىن ۇلتتىق قۇراما ويىنشىلارى 21- ناۋرىز كۇنى تالعارداعى وقۋ-جاتتىعۋ بازاسىنا جينالدى. قازاقستاندىق ماماندار تالعات بايسۋفينوۆ، نۇركەن مازبايەۆ، اندرەي فەراپونتوۆ جانە يۋريي نوۆيكوۆ جەتەكشىلىگىمەن ءبىر جاتتىعۋ وتكىزدى. رەسەيلىك «روستوۆ» ويىنشىسى ستاس پوكاتيلوۆ كومانداعا كەيىن قوسىلدى. ال، جاراقات العان شابۋىلشى تاڭات نوسەربايەۆتى قوسىمشا تىزىمنەن الەكسەي شەتكين اۋىستىردى.

انتالياعا كەلەسى قۇرامدا ويىنشىلار جول تارتتى:

قاقپاشىلار: داۆيد لوريا («ەرتىس»)، ستاس پوكاتيلوۆ («روستوۆ»، رەسەي)، ۆلاديمير پلوتنيكوۆ («قايرات»).

قورعاۋشىلار: عافۋرجان سۇيىمبايەۆ («ورداباسى»)، دميتري شومكو («استانا»)، يۋري لوگۆينەنكو («استانا»)، ەلدوس احمەتوۆ («ەرتىس»)، سەرگەي مالىي («ەرتىس»)، مۇحتار مۇحتاروۆ («ورداباسى»)، ەرمەك قۋانتايەۆ («كايرات»)، ابزال بەيسەبەكوۆ («استانا»).

جارتىلاي قورعاۋشىلار: سامات سماقوۆ («اقتوبە»)، سەرىكجان مۇجىقوۆ («استانا»)، جاقىپ قوجامبەردى («وقجەتپەس»)، يسلامبەك قۋات («قايرات»)، اسحات تاعىبەرگەن («استانا»)، ماقسات بايجانوۆ («شاحتەر»)، ۇلان قونىسبايەۆ («اتىراۋ»)، تيمۋر دوسماعامبەتوۆ («توبىل»)، باۋىرجان يسلامحان («قايرات»)، ازات نۇرعاليەۆ («ورداباسى»).

شابۋىلشىلار: الەكسەي شەتكين («استانا»)، سەرگەي حيجنيچەنكو («توبىل»).

تۇركيادا قازاقستاندىق فۋتبولشىلار وقۋ-جاتتىعۋ جيىنىن وتكىزەدى. 26- ناۋرىز كۇنى ءازىربايجان قۇراماسىمەن جولداستىق كەزدەسۋ وينايدى. كەيىن گرۋزيا استاناسى تبيليسيگە جول تارتىپ، 29- ناۋرىز كۇنى وسى ەلدىڭ قۇراماسىمەن جولداستىق ماتچ وتكىزەدى.