ناۋرىز - ىرىس پەن مولشىلىق مەرەكەسى! - ا. باتالوۆ
«سىزدەردى جاڭارۋ مەن جاڭعىرۋدىڭ، ىرىس پەن مولشىلىقتىڭ مەرەكەسى - ۇلىستىڭ ۇلى كۇنىمەن شىن جۇرەكتەن قۇتتىقتايمىن.
سوناۋ ەرتە عاسىرلار قويناۋىنان بۇگىنگە بار ءقادىر- قاسيەتىمەن، ءسان-سالتاناتىمەن جەتكەن ءاز-ناۋرىز - شىعىس حالىقتارىندا جىلدىڭ باستاۋى عانا ەمەس، ۋاقىت پەن ۇرپاقتار ساباقتاستىعىنىڭ، رۋحاني كەمەلدەنۋدىڭ ەرەن ۇلگىسى.
مەملەكەت باسشىسى نۇرسۇلتان ءابىش ۇلى نازاربايەۆ اتاپ وتكەندەي، «جاڭعىرعان ناۋرىزدىڭ تاريحى - ءبىزدىڭ تاۋەلسىزدىگىمىزدىڭ تاريحى». بيىلعى تاۋەلسىزدىكتىڭ 25-جىلدىعىنداعى ۇلىس كۇنى بارلىق قازاقستاندىقتار ءۇشىن پرەزيدەنتىمىزدىڭ سالماقتى ساياساتىنىڭ ارقاسىندا قول جەتكىزگەن تابىستارمەن، وڭدى وزگەرىستەرمەن استاسىپ جاتىر. كونە مەرەكە بۇگىنگى ومىرىمىزبەن بىتە قايناسىپ، جاڭا باستامالاردىڭ، دوستىق پەن ىنتىماقتىڭ ىرگەتاسىنا اينالدى.
قاراڭعىنى جارىق، سۋىقتى جىلى جەڭىپ، كۇن مەن ءتۇن تەڭەسەتىن وسى مەرەكەدە داستارقان اققا تولىپ، جىلى لەبىز، ىزگى تىلەكتەر ايتىلىپ، وكپە- رەنىش ۇمىتىلىپ، بارلىق ارمان-ماقساتتارىڭىز ورىندالسىن.
كوكتەم مەن گۇل اڭقىعان ناۋرىز جانعا جىلۋ، جۇرەككە مەيىرىم، مىقتى دەنساۋلىق، مول باقىت، ىرىس پەن مولشىلىق الىپ كەلسىن. ءار شاڭىراقتا شاتتىق پەن بىرلىك سالتانات قۇرىپ، كوكتەم مەن كوڭىلدىڭ شۋاعىنا بولەنە بەرىڭىزدەر!
ءاز-ناۋرىز قۇتتى بولسىن!»، - دەلىنگەن الماتى وبلىسى اكىمىنىڭ قۇتتىقتاۋىندا.
