ءانشى قاجىمۇرات شەشەنقۇل ۇلىنىڭ مۇڭعۇلياداعى ونەر ساپارى ەل كوڭىلىنەن شىقتى-فوتو

استانا. قازاقپارات - قىتاي حالىق رەسپۋبليكاسىنىڭ جۇلدىزى، قازاقستانعا تانىمال ءانشى قاجىمۇرات شەشەنقۇل ۇلىنىڭ بايان- ولگي جانە ەل استاناسى ۋلاانبااتاردا وتكىزگەن كونسەرتى جەرگىلىكتى تۇرعىنداردىڭ كوڭىلىنەن شىقتى.

 بۇل كونسەرتتى ايماقتىق «ونەر دامىسى» وداعى ۇيىمداستىردى.

 نۇرلان قاسيحان ۇلى، ونەر دامىسى وداعىنىڭ ءتوراعاسىنىڭ ورىنباسارى: «قارا جورعا» دەگەندە دەلەبەسى قوزىپ بيلەمەيتىن قازاق جوق. كوپشىلىكتىڭ كوڭىلىنەن شىققان «قارا جورعا» ءانىنىڭ ورىنداۋشىلارىنىڭ ءبىرى بەلگىلى ءانشى قاجىمۇرات شەشەنقۇل اعامىز.

 قاجىمۇرات اعامىزدىڭ ەسىمى ءانشى- سازگەر رەتىندە بارشا قازاققا وتە تانىمال. بالا كەزىنەن ساحناعا شىققان ونەر يەسى كەيىنەن سازگەرلىگىمەن دە تانىلىپ ۇلگەرگەن. «بۇلدىرگەن قىز، «سەنى عانا» ، «ماقپالجان» سەكىلدى اندەرى حالىق اراسىندا كەڭ تارالدى.

  زامانبەك ابدۋللين، ونەر دامىسى وداعىنىڭ ءتوراعاسى: قاجىمۇراتتىڭ اندەرى كورەرمەننىڭ ەرەكشە قولداۋىندا بولدى. حالىق قاجىمۇراتتى ءسۇيىپ تىڭدايدى. اسىرەسە جاستار ونىڭ ءار ءبىر ءانىن بىرگە شىرقاپ وتىردى.

ۋلاانبااتار قالاسىنداعى كونسەرتتەن تۇسكەن تابىستىڭ 10 پايىزى جانارگۇل قارىنداسىمىزدىڭ ەمدەلۋ قاراجاتى ءۇشىن تابىس ەتىلگەنىن ايتا كەتكەنىمىز ءجون بولار.

kaznews.mn