اقمولالىقتار كوكشەتاۋدا ناۋرىز مەيرامىن دۇركىرەتىپ تويلاپ جاتىر - فوتو
بۇگىن ارقانىڭ اق تاڭىمەن ىلەسكەن اقمولالىقتار وبلىس ورتالىعىنداعى تاۋەلسىزدىك الاڭىنا جينالىپ، ناۋرىز مەيرامى مەرەكەلىك تەاترلاندىرىلعان قويىلىممەن قارسى الدى. بۇل كۇنى الاڭعا 10 عا جۋىق كيىز ءۇي تىگىلىپ، مەرەكەنى تاماشالاۋعا كەلگەن كوكشەتاۋلىقتار مەن مەيماندارعا ناۋرىز كوجە، باۋىرساق ءتارىزدى ۇلتتىق تاعامدار ۇسىنىلىپ، تەگىن تاراتىلدى. سالتاناتتى شاراعا قاتىسقان ءوڭىر باسشىسى سەرگەي كۋلاگين قۇتتىقتاۋ ءسوز سويلەپ، جينالعان حالىققا جۇرەكجاردى تىلەگىن ارنادى.
«ناۋرىز قازاقستان سياقتى كوپ ۇلتتى پەن ۇلىستىڭ باسىن بىرىكتىرگەن مەملەكەت ءۇشىن ءمان- ماڭىزى ەرەكشە مەيرام. حالقىمىز قانداي قيىن كەزەڭدە دە وزدەرىنىڭ جاقسى ۇمىتتەرىن وسى مەزگىلمەن بايلانىستىرعان. سەبەبى، بۇل اتاۋلى كۇن ادامزاتقا، جالپى تىرشىلىك يەلەرىنە كۇش- قۋات بەرەتىن قاينار بۇلاق سەكىلدى. مەملەكەت باسشىسى نۇرسۇلتان نازاربايەۆتىڭ سارابدال ساياساتىنىڭ ارقاسىندا ەلىمىز گۇلدەنىپ، ءتۇرلى ەتنوستار مەن ۇلتتار ەلىمىزدە بەيبىت ءومىر ءسۇرىپ جاتىر. اعىمداعى جىلى ناۋرىز مەيرامىن مەرەكەلەۋ قوعامدىق- ساياسي ماڭىزى بار وقيعامەن، ياعني ق ر پارلامەنت ماجىلىسىنە جانە بارلىق دەڭگەيدەگى ءماسليحاتتاردىڭ دەپۋتاتتارىن كەزەكتەن تىس سايلاۋىمەن تۇسپا- تۇس كەلدى. كەشە عانا ءبىز سىزدەرمەن ءوز كونستيتۋتسيالىق قۇقىعىمىزدى پايدالانىپ، سايلاۋعا بەلسەنە قاتىسىپ، بارلىق الەمگە اۋىزبىرشىلىگىمىز بەن دوستىعىمىزدى ناقتى ىسپەن كورسەتە بىلدىك. بۇل دەگەنىمىز - ىنتىماقتاستىق پەن جالپىۇلتتىق بىرلىگىمىزدىڭ جارقىن كورىنىسى. «نۇر وتان» پارتياسىنىڭ وبلىستىق فيليالىنىڭ ءتوراعاسى رەتىندە مەن زور قۋانىشپەن الدىن الا سايلاۋ مالىمەتتەرىنە سەيكەس باسقا ساياسي پارتيالاردان ۇلكەن باسىمدىقپەن «نۇر وتان» پارتياسى جەڭىسكە جەتكەنى تۋرالى ايتقىم كەلەدى. بۇل سوڭعى جىلدار بويى پارتيانىڭ باعدارلاماسى قازاقستاندىقتاردىڭ قولداۋىن تاپقانىن بەلگىلەيدى. بۇل تەك «نۇر وتاننىڭ» جەڭىسى ەمەس، بۇل بۇكىل حالىقتىڭ جەڭىسى، - دەدى ءوڭىر باسشىسى ءوز سوزىندە.
مەرەكەلىك شارا «تابيعات سارىنى»، «ۇماي انا»، «الاستاۋ» ءتارىزدى شاعىن قويىلىمدارمەن جالعاسىن تاۋىپ، مەرەكەنىڭ كوركىن ودان سايىن قىزدىرا ءتۇستى. اسىرەسە، وبلىستىق فيلارمونيانىڭ انشىلەرى مەن وبلىستىڭ ءار شالعايىنان كەلگەن كوركەمونەرپازدار ۇجىمدارى مەرەكەنى اسەم انمەن ارلەندىرىپ، كۇمىس كۇيمەن، مىڭ بۇرالعان بيمەن تۇرلەندىرىپ، كوپشىلىك كوڭىلىن شالقىتا ءتۇستى.
اۆتور: اسلان وسپانوۆ
