ەلباسى: حالىق كەزەكتى رەت «نۇر وتان» پارتياسىنا سەنىم ءبىلدىردى
ەسكە سالا كەتەيىك، «ق ر سايلاۋ تۋرالى» زاڭىنا سايكەس، Exit-poll قورىتىندىسى ب ا ق پەن قوعامعا 21 - ناۋرىزدا ساعات 00:00-دەن كەيىن ۇسىنىلادى.
مەملەكەت باسشىسى شتابقا الدىن الا قورىتىندىلار جاريالانار الدىندا كەلدى، دەپ حابارلايدى «24.kz» تەلەارناسى. exit-poll ناتيجەسى جاريالانعاننان كەيىن ەلباسى پارتياعا كورسەتكەن سەنىمى ءۇشىن قازاقستان حالقىنا العىسىن ايتتى. وسى ورايدا مەملەكەت باسشىسى سايلاۋ اشىق ءارى تىنىش وتكەنىن اتاپ ءوتتى.
«حالىق تاعى دا ءبىز جۇرگىزگەن باعىتقا، «نۇر وتان» جاريالاعان باعدارلامالار مەن تۇعىرناماعا جانە وسى ۋاقىتتا پارتيا ۇسىنعان بارشا باعدارلامالارعا سەنىمىن ءبىلدىردى. ءبىزدىڭ الدىمىزعا قويىلعان ماقساتتار وڭاي ەمەس جانە بۇل تۇرعىدا جەڭىسكە جەتىپ وتىرمىز. بۇل - حالىقتىڭ سەنىمى»، - دەدى قازاقستان پرەزيدەنتى.
exit-poll-دىڭ قورىتىندىسى بويىنشا، «نۇر وتان» پارتياسى 82 پايىزدان استام داۋىس جيناعانىنا توقتالعان ن. نازاربايەۆ الەمدەگى پارتيالار ءۇشىن، جالپى، وسىنداي كورسەتكىشتەرگە جەتۋ ۇلكەن ارمان ەكەنىن ايتتى.
بۇدان بۇرىن حابارلانعانداي، ورتالىق كوممۋنيكاتسيالار قىزمەتىندە وتكەن بريفينگ بارىسىندا «دەموكراتيا ينستيتۋتى» جۇرگىزگەن جالپىحالىقتىق exit-poll -دىڭ قورىتىندىسىن ينستيتۋت ديرەكتورى يۋليا كۋچينسكايا ءمالىم ەتتى.
«دەموكراتيا ينستيتۋتى بۇگىن وتكەن سايلاۋ اياسىندا جالپى حالىقتىق ساۋالناما (Exit-poll ) جۇرگىزدى. ينستيتۋتتىڭ زەرتتەۋى ەلىمىزدىڭ 14 وبلىسى مەن استانا، الماتى قالالارىندا جۇرگىزىلدى. Exit-poll تاڭعى 07.00-دەن كەشكى 20.00-گە دەيىن 750 سايلاۋ ۋچاسكەسىندە جۇرگىزىلدى.
ساۋالناماعا 75 مىڭ ادام قاتىستى. سونىمەن، Exit-poll -دىڭ قورىتىندىسى بويىنشا سايلاۋعا تۇسكەن پارتيالار مىنانداي ناتيجە كورسەتتى:
«نۇر وتان» پارتياسى - 82 پايىز داۋىس، «قازاقستاننىڭ كوممۋنيستىك حالىق پارتياسى» - 7,17 پايىز، «اق جول» پارتياسى - 7,22 پايىز، «بىرلىك» پارتياسى - 0,35 پايىز داۋىس، جالپى ۇلتتىق الەۋمەتتىك- دەموكراتيالىق پارتيا - 1,21 پايىز داۋىس، «اۋىل» پارتياسى 2,05 پايىز داۋىس جيناعان»، دەپ ءمالىم ەتتى يۋ. كۋچينسكايا.
اۆتور: رۋسلان عابباسوۆ
