مارجان سۇلتانباي بۇرىنعى قازاقتاردىڭ نادان بولعانىن ايتتى

استانا. قازاقپارات - ۋاقىتىندا تانىمال تەلەجۇرگىزۋشى بولعان، كەيىن كۇيەۋگە شىعىپ، جۋرناليستيكا سالاسىنان قول ۇزگەن مارجان سۇلتانبايدىڭ پىكىرىنشە، بۇرىنعى قازاقتار بىزبەن سالىستىرعاندا نادان بولعان.

Baistars پورتالىنداعى بلوگ-جازباسىندا ول قازاقتىڭ تىم ىرىمشىل ەكەنىن ايتا كەلە، كوپتەگەن ىرىم- سەنىمنىڭ مۇلدەم اقىلعا قونىمسىز ەكەنىن مالىمدەدى.

مارجاننىڭ ايتۋىنشا، بۇرىنعىنىڭ ۇلكەندەرىنە «نە ءۇشىن؟» دەگەن سۇراق قويساڭ مىندەتتى تۇردە «جامان بولادى» دەگەن جاۋاپ قايتاراتىن بولعان. «ال، قازىرگىنىڭ بالالارىنا ولاي قىسقا قايىرا المايسىڭ، ويتكەنى نە ءۇشىن جامان بولاتىنىن ءوزىمىز دە بىلمەيمىز» دەيدى تەلەجۋرناليست.

ونىڭ پىكىرىنشە، الەمدەگى ەڭ ىرىمشىل حالىق ورىستار كورىنەدى. الايدا، قازاقتار دا كورشىلەرىنەن قالىسپاي، ءتىپتى ورىستاردىڭ ءبىراز ىرىم-سەنىمىن وزدەرىنە ءسىڭىرىپ العان دەپ ويىن ايتتى م. سۇلتانباي.

وسىلايشا، اقىلعا قونىمسىز ىرىمداردى تىزبەكتەگەن جۋرناليست ءسوز اراسىندا بۇرىنعى قازاقتاردىڭ نادان بولعانىن ايتىپ ءوتتى.

«جارايدى، بۇرىن وقۋ-توقۋ بولماعان كەزدە ادامدار جان-جانۋارلارعا قاراپ، تابيعات قۇبىلىستارىن باقىلاپ اۋا- رايىن بولجاپ وتىرعان، ت. س. س. ويتكەنى، ول كەزدە ءتىپتى مۇمكىندىك بولمادى: عىلىم دامىماعان، حالىق - نادان. ال، بۇگىنگى قوعام «سۋپەر ساۋاتتى» ءتىپتى ۇيدە وتىرعان «دوموحوزيايكاڭ» دا كەز-كەلگەن ساياساتكەرمەن ءسوز تالاستىرا الادى - Google-دىڭ ارقاسىندا. ءۇش جاستاعى بالاڭ دا ايفون-ايپادتارىڭدى اقتارىپ، شاشىپ تاستايدى» دەيدى مارجان بۇرىنعى مەن قازىرگى قازاقتى سالىستىرا كەلە.

جالپى، اتالعان بلوگ- جازبادا م. سۇلتانباي قالىڭدىقتىڭ تويداعى گۇل لاقتىرۋى، جولدى قارا مىسىقتىڭ كەسۋى، 13- كۇننىڭ جۇماعا سايكەس كەلۋى، بويجەتكەن قىزدىڭ ۇستەل بۇرىشىنا وتىرماۋى، مىسىقتىلەۋ جانە ۇيدەگى گۇلدەرگە قاتىستى كەڭىنەن تارالعان نانىم- سەنىمدەرگە توقتالىپ وتكەن. ياعني، ولاردىڭ قازاقى بولمىسقا جات ەكەنىن ايتىپ وتىر.

«ىرىم - بۇل ادامنىڭ ءوزىن جانە وزگەلەردى الداۋى دەگەن تۇجىرىم جاسادىم. ەگەر جاقسىلىققا جورامالدايتىن بولسا، ارينە، سەنە بەرسىن. اركىمنىڭ ءوز قالاۋى عوي. ەسىمە تۇسكەن، ويىمدا جۇرگەن بىرنەشە ىرىمدى مىسالعا كەلتىرىپ، ءوز پىكىرىمدى ءبىلدىردىم. كەلىسپەۋلەرىڭىز مۇمكىن. سىزدەر دە پىكىرلەرىڭىزدى جازىڭىزدار! ومىردە نەشە ءتۇرلى قىزىقتار بولىپ جاتادى: ىرىمنىڭ كۇشى مە، الدە جاي عانا سايكەستىك پە؟..» دەيدى جۋرناليست ءوز جازباسىندا.

ول سونداي-اق، وسى جازباسىنا ۇزدىك كوممەنتاري جازعان وقىرماندارىن ماراپاتتاۋعا دا ۋادە بەردى.

ەستەرىڭىزگە سالايىق، وسىدان بىرنەشە جىل بۇرىن "شىركىن-life" تەلەجوباسىن جۇرگىزىپ تانىمال بولعان مارجان سۇلتانباي اتالعان باعدارلامانىڭ بىرىندە شاشىن تاقىرلاپ الىپ، كوپشىلىكتىڭ ەسىندە قالعان بولاتىن.