استاناداعى كۇرەستەن ءوتىپ جاتقان ليتسەنزيالىق تۋرنيردە بۇگىن ءۇش قازاقستاندىق وليمپيادا جولداماسىن جەڭىپ الدى

استانا. قازاقپارات - استانا قالاسىندا كۇرەستەن ءوتىپ جاتقان ليتسەنزيالىق تۋرنيردە بۇگىن ءۇش قازاقستاندىق وليمپيادا جولداماسىن جەڭىپ الدى.

«قازسپورت» تەلەارناسىنان كورسەتىپ جاتقانىنداي، ە. لاريونوۆا 63 كەلىگە دەيىنگى سالماقتا الدىمەن وزبەكستاندىق قارسىلاسىن تازا جەڭسە، سودان كەيىن جارتىلاي فينالدا ۇندىلىك سپورتشىنى 8:2 ەسەبىمەن تىزە بۇكتىردى. ءسويتىپ فينالعا شىعىپ، وليمپيادا ليتسەنزياسىن يەلەنگەن ەكاتەرينا ەندى التىن جۇلدە ءۇشىن تالاسادى.

ايتا كەتەيىك، ە. لاريونوۆا - كوپتەگەن حالىقارالىق جارىستاردا توپ جارىپ جۇرگەن بالۋان، 2013-جىلعى الەم چەمپيوناتىنىڭ قولا جۇلدەگەرى.

وسى جارىستا سونداي-اق تاعى ءبىر قازاقستاندىق جۇلدىز ەشىموۆا 48 كەلىگە دەيىن سالماقتا فينالعا شىعىپ، ول دا وليمپيادا جولداماسىنا يە بولدى.

سونىمەن بىرگە ەركىن كۇرەستەن 125 كەلىگە دەيىنگى سالماق دارەجەسىندە ونەر كورسەتكەن داۋلەت شابانباي دا فينالعا شىعىپ، وليمپيادا جولداماسىن قانجىعاسىنا بايلادى.

اۆتور: ەلجان ەرالى