استانا «جەر ساعاتى» دۇنيەجۇزىلىك ەكولوگيالىق اكتسياسىنا قاتىستى
بارشا الەمدە ميللياردتاعان ادام پلانەتامىزدىڭ بولاشاعىنا نەمقۇرايلى قاراماۋدىڭ بەلگىسى رەتىندە ءوز ۇيلەرى مەن پاتەرلەرىندە جارىق پەن ەلەكتر قۇرالدارىن ءبىر ساعاتقا ءوشىردى. سونىمەن قاتار، باستى وبەكتىلەر مەن تۋريستىك كورىكتى جەرلەردە دە جارىق ءسوندىرىلدى.
استانادا ساعات 20:30 - 21:30 ارالىعىندا 300 استام عيماراتتىڭ سىرتقى جارىقتاندىرىلۋى توقتاتىلدى، سونىڭ ىشىندە «بايتەرەك» مونۋمەنتىندە، «حان شاتىر» ويىن- ساۋىق ورتالىعىندا، بەيبىتشىلىك جانە كەلىسىم سارايىندا، «استانا وپەرا» مەملەكەتتىك وپەرا جانە بالەت تەاترىندا.
شاراعا «قازاقستان» سپورت كەشەنى، «استانا ارەنا» ستاديونى، «الاۋ» مۇز ايدىن سارايى، «بارىس ارەنا» سياقتى سپورتتىق نىساندار دا قوسىلدى. م. گوركي اتىنداعى مەملەكەتتىك اكادەميالىق ورىس دراما تەاترى، ەلوردالىق سيرك، ق. قۋانىشبايەۆ اتىنداعى قازاق مۋزىكالىق دراما تەاترى، «جاستار» سارايى، قۋىرشاق تەاترى مەن «ناز» ءبي تەاترى دا اكتسياعا قولداۋ كورسەتتى.
«جەر ساعاتى» - دۇنيەجۇزىلىك جابايى تابيعات قورىنىڭ (WWF) بارشا الەمدە جۇزدەگەن مەملەكەتتى قامتىعان جانە تابيعاتتى ساقتاۋدىڭ، پلانەتامىزدىڭ شەكتەۋلى رەسۋرستارىنا قامقور بولۋدىڭ بەلگىسى بولىپ تابىلاتىن اۋقىمدى اكتسياسى. وتكەن جىلى اكتسياعا 172 مەملەكەت پەن 2 ميللياردتان استام ادام قاتىسقان.
بيىل ەلىمىزدە «جەر ساعاتى» 16- ءساۋىر - 16- مامىر ارالىعىندا وتەتىن «ۇلتتىق ورمان وتىرعىزۋ كۇنى» رەسپۋبليكالىق اكتسياسىنىڭ قامقورلىعىمەن ۇيىمداستىرىلدى. اكتسياعا قازاقستاننان 80 قالا قاتىستى. ەلوردا اتالعان حالىقارالىق شارانى بىرنەشە جىلدان بەرى قولداپ كەلەدى.
اكتسيا قوعام نازارى بالامالى ەنەرگيا كوزدەرىن پايدالانۋعا باعىتتالعان «ەكسپو-2017» حالىقارالىق كورمەسى قارساڭىندا اسا ماڭىزدى بولىپ تابىلادى. مەملەكەت ەنەرگيا ۇنەمدەگىش تەحنولوگيالاردى پايدالانىپ، «جاسىل ەكونوميكانى» دامىتۋدا، وسى ماقساتتا جاسالعان العاشقى قادام - رەسۋرستاردى پايدالانۋدى وڭتايلاندىرۋ جانە تابيعات قورعاۋ قىزمەتىنىڭ تيىمدىلىگىن ارتتىرۋ، سونداي-اق، «جاسىل» ينفراقۇرىلىمدى قۇرۋ.
