استاناعا كوگىلدىر وتىن ءازىر كەلمەيدى

استانا. قازاقپارات - استاناعا گاز جەتكىزۋ جوباسىنىڭ قاشان قايتا قولعا الىنارى بەلگىسىز. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگكە سىلتەمە جاساپ استانا ارناسى حابارلادى.

2015-جىلى قازاقستان 45 ميلليارد تەكشە مەتردەن استام گاز ءوندىرىپ، ونىڭ 13 ميللياردى ەكسپورتتالعان. تاۋەلسىزدىك جىلدارىندا قازاقستان گاز ءوندىرىسىن 5,5 ەسەگە ارتتىردى. كوگىلدىر وتىندى سىرتقا ساۋدالاۋ كولەمى دە ايتارلىقتاي ۇلعايدى.

«ەلوردانى گازداندىرۋ جوباسى بەلگىسىز مەرزىمگە توقتاتىلعان، ال قاشان قولعا الىنارى بەلگىسىز»، - دەيدى عالىم نۇرعازيەۆ.

«استاناعا گاز تارتۋدىڭ ەكى جوباسى قارالعان. ءبىرىنشىسى - «قارتالى - توبىل - كوكشەتاۋ - استانا» ماگيسترالى. سونداي اق «بەينەۋ - بوزوي - شىمكەنت» قۇبىرىنا «قىزىلوردا - جەزقازعان - تەمىرتاۋ - قاراعاندى - استانا» ماگيسترالىن جالعاۋ ارقىلى ەلورداعا گاز جەتكىزۋ جوسپارى دا بار. العاشقىسى بويىنشا جۇمىستار اتقارىلدى، جوبالىق-سمەتالىق قۇجاتتاماسى بار. ەكىنشى ماگيسترالعا قاتىستى تەحنيكالىق-ەكونوميكالىق ەسەپتەۋلەر جاسالدى. قازىر ەكى جوبانى دا توقتاتا تۇرۋ جايلى شەشىم شىعارىلدى»، - دەپ ءتۇسىندىردى ەنەرگەتيكا مينيسترلىگى گاز ونەركاسىبىن دامىتۋ دەپارتامەنتىنىڭ باسشىسى عالىم نۇرعازيەۆ.