ناۋرىز مەيرامىنا وراي اسكەري قىزمەتشىلەر كوك اسپاندا شاڭىراقتىڭ كەسكىنىن بەينەلەدى - فوتو، - كەسكىن

استانا. قازاقپارات - بارشا قازاقستاندىقتار جۋاننىڭ جىڭىشكەرىپ، جىڭىشكەنىڭ ۇزىلەتىن، جاڭارۋ، كۇن مەن ءتۇننىڭ تەڭەلەتىن شاعى، اسىعا كۇتكەن ءاز-ناۋرىز مەيرامىنا قىزۋ دايىندالۋدا.

قازاقستان رەسپۋبليكاسى قارۋلى كۇشتەرىنىڭ اسكەري قىزمەتشىلەرى بۇل مەيرامدى بارلىق ەلدە كەڭىنەن اتاپ وتەدى. وسى كوكتەمگى مەرەكەگە وراي اۋە قورعانىسى كۇشتەرىنىڭ اسكەري قىزمەتشىلەرى قازاقستاندىقتارعا سىيلىق تارتۋ ەتتى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتىنەن.

سۋ-27 جويعىش ۇشاقتارىندا اۆيابازادان ۇشىپ شىعىپ، كوك اسپاندا وتباسى - وشاق قاسىنىڭ، ۇرپاق جالعاستىعىنىڭ، جانۇيالىق جىلۋلىق پەن ىرىس-بەرەكەنىڭ سيمۆولىنا اينالعان شاڭىراقتىڭ ناقىشىن بەينەلەدى. قازاق حالقىندا وسى ەلەمەنتپەن كوپتەگەن ىزگى تىلەكتەر بايلانىستى. ماسەلەن، «شاڭىراعىڭ بيىك بولسىن»، «شاڭىراعىڭ شايقالماسىن» دەگەن سىندى اق تىلەككە تولى باتالى سوزدەر ءجيى كەزدەسەدى. ق ر قارۋلى كۇشتەرىندە شۋاققا تولى كوكتەمگى مەيرام قارساڭىندا سالتاناتتى ءىس-شارالار، مەرەكەلىك كونسەرتتەر جانە كورمەلەر وتۋدە.