يندونەزيالىق ونەرتاپقىش پوليەتيلەننەن جانارماي وندىرەدى - كەسكىن

استانا. قازاقپارات - الەمدى الاڭداتقان ەكولوگيالىق قالدىقتاردان ارىلۋدىڭ جولىن يندونەزيالىق ونەرتاپقىش ۇسىنىپ وتىر.

ول موتوسيكلىنە قاجەتتى جانارمايدى ءوزى وندىرەدى، دەپ حابارلايدى 24.kz تەلەارناسى.

بۇل ءۇشىن مۇنايدىڭ قاجەتى جوق، كادىمگى جەلگە ۇشقان نەمەسە قوقىستا جاتقان پوليەتيلەن قالدىقتارى جەتىپ جاتىر. حاميدي ەسىمدى ونەرتاپقىش كۇنىنە 25 كەلى پوليەتيلەن قالدىعىن قايتا وڭدەيدى.

جاس جىگىت بولاشاقتا تەك ءوزىنىڭ موتوسيكلىن عانا ەمەس، بۇكىل قالا تۇرعىندارىنىڭ كولىگىن وسىنداي وتىنمەن قامتاماسىز ەتۋدى جوسپارلاپ وتىر. «باستاپقىدا مەن ءوز ءىسىمدى اشىپ، جاي عانا كاسىپپەن اينالىسقىم كەلگەن. الايدا سوڭعى ۋاقىتتا قوقىستىڭ قورشاعان ورتاعا زيانى تۋرالى ءجيى ويلانا باستادىم. كۇندەردىڭ كۇنىندە ماعان تابىس كوزىن پايدالى ىسكە اينالدىرۋ ويى كەلدى»، دەيدى ونەرتاپقىش حاميدي.

دجاكارتادا كۇندەلىكتى 6 مىڭ توننا قوقىس جينالادى. جەرگىلىكتى كوممۋنالدىق مەكەمە ونى شىعارىپ تا ۇلگەرمەيدى. سوندىقتان بيلىك بولاشاقتا بۇل ىسكە شەتەلدىك ينۆەستورلاردى تارتۋعا نيەتتى.

ال ازىرگە دجاكارتا باسشىلىعى ەكولوگيالىق جاعدايدى جاقسارتۋ ءۇشىن سۋپەرماركەتتەردە پوليەتيلەن پاكەتتەر ءۇشىن قوسىمشا اقى الادى. قازىر يندونەزيا تەڭىزدى لاستايتىن ەلدەر قاتارىندا قىتايدان كەيىن ەكىنشى ورىندا تۇر.