قازاقستاندىق ۆەلوشاباندوز ريو وليمپياداسىنىڭ جولداماسىن جەڭىپ الدى
سولتۇستىك قازاقستاندىق ارتەم زاحاروۆ - ترەك جارىسى - ومنيۋمدا ونەر كورسەتەتىن ەلدىڭ ۇلتتىق قۇراماسىنىڭ كوشباسشىسى، ول 2016-جىلعى ريو-دە-جانەيرودا وتەتىن جازعى وليمپيادا ويىندارىنا رەسمي ليسەنزيانى جەڭىپ الدى.
بۇل تۋرالى س ق و دەنە شىنىقتىرۋ جانە سپورت باسقارماسىنىڭ باسپا ءسوز قىزمەتى حابارلادى.
«ارتەم زاحاروۆ 2013-جىلعى ازيا چەمپيونى، ازيا كۋبوگىنىڭ جەڭىمپازى، 2013. 2016-جىلدارداعى الەم كۋبوگىنىڭ قولا جۇلدەگەرى، ومنيۋمدا ازيا چەمپيوناتىنىڭ قولا جانە كۇمىس جۇلدەگەرى.
جاپوندىق وشيما قالاسىندا وتكەن ۆەلوسيپەد سپورتىنان ازيا چەمپيوناتىندا تاماشا ونەر كورسەتكەن ارتەم زاحاروۆ ترەك جارىسى كوپسايىسى - ومنيۋمدە كۇمىس جۇلدەگەر اتاندى. ودان ءارى سولتۇستىك قازاقستاندىق سپورتشى گونكونگتەگى الەم كۋبوگىندا قولا جۇلدەنى يەلەندى جانە لوندونداعى الەم چەمپيوناتىنىڭ قورىتىندىسىمەن ترەك سپورتىنان كۇشتىلەر وندىعىنا كىردى»، - دەلىنگەن حابارلامادا.
قازىرگى كەزدە قازاقستان تۇتاستاي العاندا سپورتتىڭ ءار تۇرىنەن 50 ليسەنزياعا قول جەتكىزىپ وتىر. ونىڭ ەكەۋىن سولتۇستىك قازاقستاندىق سپورتشىلار يەلەنگەن. ەسكە سالا كەتەيىك، وتكەن جىلى سولتۇستىك قازاقستاندىق جەڭىل اتلەت يرينا ەكتوۆا ۇشتىك سەكىرۋدە وليمپيادادا ويىندارى - 2016 ليتسەنزياسىنا يە بولعان ەدى.
قازاقستاننىڭ تاسجولداعى ۆەلوسپورتتان ريو-دە جانەيروداعى وليمپياداعا ەكى ليسەنزياسى بار. ونى العاشقى بولىپ سولتۇستىك قازاقستاندىق الەكسەي لۋتسەنكو يەلەندى. وعان س ق و ۆەلومەكتەبىنىڭ تاعى ءبىر تاربيەلەنۋشىسى باقتيار قوجاتايەۆ تا ىلەسۋى مۇمكىن. ەكى سپورتشى دا بۇگىندە «Astana» كاسىبي ۆەلوكومانداسىندا وينايدى.
سونىمەن بىرگە ليسەنزيا ءۇشىن سايىستى ءبىزدىڭ جەڭىل اتلەتتەر مارگاريتا مۇقاشيەۆا، ميحايل ليتۆين، ەۆگەني ەكتوۆ جانە اۋىر اتلەت ايدار قازوۆ جالعاستىرۋدا. 2016-جىلعى جازعى پاراليمپيادالىق ويىندارعا قاتىسۋعا مۇمكىندىگى شەكتەۋلى سپورتشىلار اراسىندا جەڭىل اتلەتيكادان ونەر كورسەتەتىن ءبىزدىڭ سەرگەي حارلاموۆتىڭ دا ءۇمىتى بار.
2016-جىلعى جازعى وليمپيادالىق ويىندار برازيليالىق ريو-دە-جانەيرودا 5-21- تامىز ارالىعىندا وتەدى.
