بيىل قىتايدىڭ ءىرى اگروكورپوراتسياسى قازاقستاندا اۋىل شارۋاشىلىعى ونىمدەرىن وڭدەيتىن كاسىپورىن سالادى
«ايتسزيۋي» كورپوراتسياسى قازاقستاندا ءىرى وڭدەۋ كاسىپورنىن سالىپ، كەيىننەن اگرارلىق ونىمدەردى قىتاي نارىعىنا ەكسپورتتاۋدى جوسپارلاۋدا. قازىرگى كەزدە ق ر اۋىل شارۋاشىلىعى ءمينيسترى ا. مامىتبەكوۆپەن جانە ق ح ر- داعى ق ر ەلشىسى ش. نۇرىشيەۆپەن كەلىسسوزدەردەن كەيىن ءبىز بۇل جوبا بويىنشا تولىق قولداۋعا يە بولدىق. جوبانىڭ ءبىرىنشى كەزەگىنىڭ قۇرىلىسىن ساۋىردە باستاپ، وسى جىلدىڭ سوڭىنا دەيىن اياقتاۋ جوسپارلانۋدا - زاۋىت جىلىنا 160 مىڭ توننا ماي شىعاراتىن بولادى. كەلەسى جىلى ءبىز 20 مىڭ توننا ۇن ءوندىرىسى كاسىپورىنىن اشۋدى جوسپارلاپ وتىرمىز. ءبىز سونداي-اق قۋاتتىلىعى 10-20 مىڭ توننالىق ەت كومبيناتىن سالۋ نيەتىندەمىز»، - دەدى تسزيا حەي قازاقستاندىق جۋرناليستەرگە بەرگەن سۇحباتىندا.
ونىڭ ايتۋىنشا، كومپانيا ق ح ر- دا راپس مايىن ءوندىرۋ بويىنشا نارىق كوشباسشىسى بولىپ وتىر. قازاقستاندا وسى ءونىمدى شىعارىپ، كەيىننەن قىتاي نارىعىنا دا، باسقا دا نارىقتارعا، سونىڭ ىشىندە ەۋروپاعا ەكسپورتتاۋ جوسپارلانۋدا. كورپوراتسيانىڭ ق ح ر- دا مىڭنان استام ءوز دۇكەندەرى بار.
«قازىرگى كەزدە ونىمدەردىڭ ءبىر بولىگى قىتاي نارىعىنا جەتتى. قازاقستاندىق «الماتى ونىمدەرى» كومپانياسى بار. العاشقى كونتەينەر قازىردىڭ وزىندە كەلىپ جەتتى. ءۇش كۇننىڭ ىشىندە العاشقى قايتارىلعان كونتەينەر پويىزىمەن (88 كونتەينەر، 2 مىڭ توننا) قازاقستاندىق ءونىم قىتاي نارىعىنا جەتەدى. بۇل جوبا «جىبەك جولى» ەكونوميكالىق بەلدەۋى مەن «نۇرلى جول» جاڭا ەكونوميكالىق ساياساتىنىڭ ءتۇيىسۋى اۋقىمىندا جۇزەگە اسىرىلادى. «ايتسزيۋي» كومپانياسى قازاقستاندىق مامانداردى قىتايداعى ءوز كاسىپورىندارىندا وقىتىپ، كەيىننەن ق ر- ىنداعى وندىرىستەردە جۇمىسقا ورنالاستىرماق»، دەپ اتاپ كورسەتتى قىتاي كاسىپكەرى.
ول سونداي-اق ق ر- نىڭ سولتۇستىك قازاقستان وبلىسىندا قىتايدا ۇلكەن سۇرانىسقا يە ونىمدەردى تەرەڭ وڭدەيتىن يندۋستريالىق پارك قۇرۋ جونىندە كەلىسسوزدەر جۇرگىزىلۋدە ەكەنىن ايتتى. «ايتسزيۋي» كومپانياسىنىڭ ق ر- ىنا ينۆەستيتسيالار كولەمى 50-60 ميلليون دوللارعا جۋىق بولادى. بيىلعى جىلى 15 ميلليون دوللار ينۆەستيتسيالانادى.
«ايتسزيۋي» كورپوراتسياسى 1936-جىلى شەنسي پروۆينتسياسىنىڭ سيان قالاسىندا قۇرىلعان. ول ساپالى ۇن ونىمدەرىمەن داڭقى شىققان. سونداي-اق بۇرشاق تۇقىمداس ونىمدەر جەلىسى بار.
ق ح ر ءتوراعاسى شي جينپيڭ 2015-جىلعى 13- اقپاندا «چۋنتسزە» كوكتەم مەرەكەسى قارساڭىندا «ايتسزيۋي» ونىمدەرىن (وسىمدىك مايى، كۇرىش جانە ۇن) ساتىپ الىپ، شەنسي پروۆينتسياسىنىڭ يانان قالاسى ماڭىنداعى ليانتسزياحە اۋىلىنىڭ تۇرعىندارىنا سىيعا تارتتى.
