باس پروكۋراتۋرا سىبايلاس جەمقورلىققا قاتىستى ايىپپۇلدى ەسەلەپ ارتىرۋدى ۇسىنادى

استانا. قازاقپارات - باس پروكۋراتۋرا ەكونوميكالىق جانە سىبايلاس جەمقورلىق قىلمىستار بويىنشا ايىپپۇلدى ەسەلەپ ارتىرۋدى ۇسىنادى.

بۇل تۋرالى بۇگىن سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ كەڭەيتىلگەن وتىرىسىندا ق ر باس پروكۋرورىنىڭ ءبىرىنشى ورىنباسارى يوگان مەركەل ءمالىم ەتتى. كوميتەت وتىرىسىندا «ق ر كەيبىر زاڭنامالىق اكتىلەرىنە تۇتىنۋشىلار قۇقىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.

زاڭ جوباسىنا سايكەس، باس پروكۋراتۋرا ەكونوميكالىق، لاۋازىمدىق جانە سىبايلاس جەمقورلىق قىلمىستار بويىنشا باس بوستاندىعىنان ايىرۋ جازاسىنىڭ ەڭ جوعارى مەرزىمىن قىسقارتۋدى ۇسىنادى. «ەسەسىنە جاڭا بالاما ايىپپۇلدار ەنگىزىپ، ايىپپۇل سالۋدىڭ مولشەرىن ەسەلەپ قاتايتۋدى ۇسىنامىز. ايتپاقشى، بىلتىر وسىنداي ايىپپۇلدى ەسەلەپ ارتتىرۋدىڭ ناتيجەسىندە بيۋدجەتكە 3,5 ميلليارد تەڭگە ءتۇستى. بۇل جەردە نەگىزىنەن پارا العانى ءۇشىن عانا ايىپپۇل كورسەتكىشى كوتەرىلگەن بولاتىن»، - دەدى ي. مەركەل.

ونىڭ ايتۋىنشا، قازىرگى كۇنى ەكونوميكالىق قىلمىستار ءۇشىن باس بوستاندىعىنان ايىرۋ مەرزىمى قاساقانا كىسى ءولتىرۋ جازاسىمەن بىردەي. بۇل الەمدىك تاجىريبەگە قايشى ءارى كوپتەگەن ەلدەردە ەكونوميكالىق قىلمىستارعا ايىپپۇل سانكسيالارى قاراستىرىلعان.

ءسوز اراسىندا باس پروكۋراتۋرا وكىلى 2015 -جىلى زاڭنامانى ىزگىلەندىرۋ اياسىندا قىلمىستىق سوتتار ىستەردىڭ 67 پايىزىنا باس بوستاندىعىنان ايىرۋعا جاتپايتىن جازا تاعايىنداعان. بۇل كورسەتكىش ونىڭ الدىنداعى جىلدارى 40 پايىز شاماسىندا ەدى.

اۆتور: قانات مامەتقازى ۇلى