اتامبايەۆ: پرەزيدەنتتە مۇراگەر بولماۋى ءتيىس

استانا. قازاقپارات - قىرعىزستاننىڭ پرەزيدەنتى المازبەك اتامبايەۆتىڭ عۇمىربايانى وتە باي.

ماسكەۋدە ءبىلىم العان. ەڭبەك جولىن قاراپايىم ينجەنەر بولىپ باستاعان. وندىرىستە باسشىلىق قىزمەتتەردى اتقارعان.

مينيستر، ءبىر ەمەس ەكى مارتە قىرعىزستاننىڭ پرەمەر-ءمينيسترى بولعان. ساياسي، قوعامدىق جۇمىستارمەن اينالىسقان. دەپۋتات بولىپ سايلانعان. ۋاقىتشا ۇكىمەت جەتەكشىسىنىڭ ورىنباسارى قىزمەتىن اتقارعان.

پرەزيدەنت سايلاۋىنا ءبىر ەمەس ءۇش مارتە تۇسكەن. تەك ۇشىنشىسىندە عانا باعى جاندى. پرەزيدەنتتىك تاققا ءۇش قايتارا تالاسۋعا ەكىنىڭ ءبىرى تاۋەكەل ەتە بەرمەسى انىق.

ال اتامبايەۆ بۇعان تاۋەكەل ەتتى. ءبىراق پرەزيدەنتىككە ەكىنشى قايتارا سايلانۋعا تاۋەكەل ەتپەدى. نەگە؟

ەگەر ورتالىق ازيانىڭ «ماڭگىلىك پرەزيدەنتتەرىنە» ۇقساسا، سولارعا ەلىكتەسە، اتامبايەۆ اتا زاڭعا وزگەرىس ەنگىزىپ، تاقتا قالۋدىڭ ءبىر امالىن تابار ەدى عوي. جوق، اتامبايەۆ اتا زاڭنان اتتاعان جوق.

ايتقانداي، بيلىكتەن كەتەتىنىن ءبىر جىل توعىز اي بۇرىن ەسكەرتكەن اتامبايەۆتىڭ مۇراگەر تۋرالى مۇلدەم ءسوز قوزعاعىسى دا كەلمەيدى. ونىڭ ۇعىمىندا پرەزيدەنتتە مۇراگەر دەگەن بولمايدى.

- ەگەر مەن مۇراگەرىمدى دايىنداپ، حالىقتى سوعان داۋىس بەرۋگە شاقىرسام، وندا ءبىزدىڭ ەلىمىزگە دەموكراتيا كەلمەيدى. مەن مۇنى اشىق ايتامىن. حالىق كىمگە سەنسە، سوعان داۋىس بەرەدى. ەگەر قاتەلەسسە، جاۋابىن دا حالىق بەرەدى. ارينە، ءار پارتيالار وزدەرىنىڭ كانديداتتارىن ۇسىنادى. ءبىراق مەن قاتاڭ قاعيدانى ۇستانامىن - پرەزيدەنت رەتىندە بىرەۋدى ورنىما قالدىرمايمىن، ەشكىمدى تاعايىندامايمىن. ونى جۇرتشىلىق ءوزى شەشسىن. ويتكەنى تاقتى مۇراگەرلىك جولمەن العان ەلدە ەشقانداي دەموكراتيا بولمايدى، - دەدى اتامبايەۆ.

پرەزيدەنتتىڭ ويىنشا دەموكراتيالىق ەلدە تۇرعىسى كەلگەن حالىق دەموكراتيا ءۇشىن كۇرەسە دە ءبىلۋى كەرەك.

- ادامدار قاتەلەسسە، قاتەلەسە بەرسىن، مۇسىركەسە مۇسىركەي بەرسىن. قاجەت بولسا، اتا زاڭعا وزگەرىستەردى ەنگىزەمىز. ءبىراق بۇل وزگەرىستەر ەلىمىزدىڭ كەرى كەتپەۋىنە، كلاندىق، وتباسىلىق جۇيەنىڭ قايتىپ ورالماۋىنا كەپىل بولۋى ءتيىس. مەنىڭ مىندەتىم - قىرعىزستاندا ءادىل سايلاۋ وتكىزۋ، - دەدى پرەزيدەنت.

قىرعىزستاننىڭ اتا زاڭى بويىنشا ءبىر ادام ەلدىڭ پرەزيدەنتىگىنە ەكىنشى قايتارا سايلانا المايدى. پرەزيدەنتتىك وكىلەتتىك التى جىل. المازبەك اتامبايەۆ قىرعىزستاننىڭ پرەزيدەنتى بولىپ 2011-جىلدىڭ قازانىندا سايلانعان. پرەزيدەنتتىك قىزمەتكە سول جىلدىڭ جەلتوقسانىندا كىرىستى.

«رەيتينگ» گازەتى، 10-11№،  17- ناۋرىز 2016-جىل.

oinet.kz