قانات يسلام: ەلدىڭ اتىنان وليمپياداعا قاتىسۋ كەرەك بولسا، مەن دايىنمىن
«قانات اعا، كاسىپقوي بوكسشىلاردىڭ دا وليمپياداعا قاتىسۋىنا بولادى دەگەن ءسوز شىققالى «قانات يسلام بارادى ما ەكەن؟» دەگەن سۇراقتى ءار قازاق قويدى دەسەك ارتىق ايتقاندىق ەمەس.
سەبەبى ءبارىمىز وليمپيادادا كوك تۋدى جەلبىرەتكەنىڭىزدى كورگىمىز كەلەدى. ريوعا بارىپ، ەل نامىسىن قورعاۋ قانشالىقتى مۇمكىن بولىپ تۇر؟!» - دەگەن سۇراققا بىلعارى بىلعارى قولعاپ شەبەرى تومەندەگىدەي جاۋاپ بەردى.
«ەلدىڭ ىقىلاسىنا، قولداۋىنا راحمەت. مەنى ىزدەيتىن قازاعىمنىڭ بارىنا شۇكىر. ەلدىڭ ىقىلاسى جەڭىسكە جەتۋىمە سەنىم ۇيالاتىپ، سەرپىن بەرەدى. قازىر مەن ا ق ش- تا كەلەسى جاتتىعۋىما دايىندالىپ جاتىرمىن. بۇيىرتسا جەكپە-جەك كەلەسى ايدىڭ سەگىزىنە دەپ جوسپارلانۋدا. ارينە، مەن ءۇشىن وليمپيادانىڭ ورنى بولەك. ا ق ش- تا دا كوك تۋدى جەلبىرەتۋ ءۇشىن ءجۇرمىن عوي. ءبىراق وليمپيادا ويىندارىندا ءانۇراندى ويناتۋ ول بولەك نارسە. ول - بولەك قۋانىش. قازىر مەنىڭ سالماعىمدا دانيار ەلەۋسىنوۆ، جانىبەك ءالىمحان ۇلى ىنىلەرىم ونەر كورسەتىپ ءجۇر. ەكەۋى دە جاقسى جىگىتتەر. ولار بوكس الەمىنىڭ جارىق جۇلدىزىنا اينالاتىنىنا سەنەمىن. تىلەكشىمىن. شىنىمدى ايتسام، سول ەكى ءىنىمنىڭ جولىن كەسكىم كەلمەيدى. ارينە، ماڭدايعا جازعانى بولادى. ەگەر، قانات وليمپياداعا ەلدىڭ اتىنان سەن بارۋىڭ كەرەك دەسە، مەن دايىنمىن. ءبارىن تاستاپ بارۋعا ءازىرمىن. بيىلعى دودا وتە تارتىستى بولماق، وليمپيادادا ونەر كورسەتەتىن باۋىرلارىما تەك ساتتىلىك تىلەيمىن. كوك تۋدى جەلبىرەتىپ، ەل قورجىنىنا كوپ التىن سالادى دەپ سەنەمىن»، - دەدى ول.
بەرىك سۇلتان
