تاجىكستان پرەزيدەنتى اعايىندىلاردىڭ ءبىر- بىرىنە ۇيلەنۋىنە تىيىم سالدى

استانا. قازاقپارات - تاجىكستان پرەزيدەنتى ەمومالي راحمون اعايىندىلاردىڭ ءبىر- بىرىنە ۇيلەنىپ، تۋىسقاندار اراسىندا قىز الىسۋىنا تىيىم سالدى. وتباسى كودەكسىنە ەنگىزگەن تۇزەتۋلەرگە ساي، تاجىك ازاماتتارىنا بۇدان بىلاي وزگە ۇلتتىڭ جات ەسىمدەرىن قويۋعا دا بولمايدى.  

وسىلايشا ەندى تاجىكستاندا بالانىڭ اتىن تاجىك مادەنيەتىنە جات اتاۋلارمەن، بۇيىمدارمەن، جانۋارلار جانە قۇستارمەن بايلانىستىرىپ قويۋعا تىيىم سالىندى.

 بۇعان قوسا، ادامداردى تاپقا بولەتىن، باسقالاردىڭ نامىسى مەن قادىرىن تۇسىرەتىن ەسىمدەردى دە قويۋعا بولمايدى. ولارعا «موللا»، «شايح»، «تورە»، «حان» جانە وسىعان ۇقساس باسقا دا سوزدەر جالعانعان ەسىمدەر جاتادى. جىل باسىندا تاجىكستان ۇكىمەتىندەگى تەرمينولوگيا جانە ءتىل جونىندەگى كوميتەت 4-5 مىڭ تاجىك ەسىمدەرىنەن قۇرالعان ءبىرىڭعاي ءتىزىمىن جاساعان بولاتىن. ەندى جاڭا تۋعان سابيلەردىڭ اتتارى وسى تىزىمنەن قويىلاتىن بولادى.

 سونداي- اق بۇدان بىلاي بۇل ەلدە نەمەرە تۋىستار، ناعاشىلى- جيەندەر مەن بولەلەر، ءبىر ومىراۋ ەمگەن جىگىت پەن قىزدار نەكەلەسە المايدى. ماماندار پىكىرىنشە، مۇنداي شەشىم قابىلداۋعا تۋىستار نەكەسىنەن تۋعان بالالاردىڭ كوپ جاعدايدا مۇگەدەك بولىپ قالۋى تۇرتكى بولعان. تاجىكستان دەنساۋلىق ساقتاۋ مينيسترلىگىنىڭ اقپاراتى بويىنشا، ەلدە 18-گە تولماعان 26 مىڭنان استام مۇگەدەك بالا بار. ساراپشىلاردىڭ مالىمەتىنە قاراعاندا، بۇل بالالاردىڭ 35 پايىزى تۋىستار اراسىنداعى نەكەدەن تۋعان.

  https: 31.kz