وزگە ەلدىڭ بويجەتكەندەرى شاشىن قالاي كۇتەدى؟

استانا. قازاقپارات - ماسساگەت پورتالى نازارلارىڭىزعا ءار ەلدىڭ قىز-كەلىنشەكتەرى شاشتارىن قالاي كۇتەتىنىن ۇسىنادى.

فرانسۋز ءادىسى. شاشتىڭ سارى ءتۇستى بولۋى - ءسان الەمىندە وزەكتىلىگىن جويمايدى. كوزدىڭ جاۋىن الاتىن اشىق تۇستەردى، اسىرەسە، ەر-ازاماتتار جاقسى كورەدى. شاش قانىق سارى ءتۇستى بولىپ ءارى جالت-جۇلت ەتىپ قۇبىلىپ تۇرۋى ءۇشىن فرانسيا قىزدارى تۇيمەداق تۇنباسىن قولدانادى ەكەن.

2 اس قاسىق كەپتىلىرىلگەن تۇيمەداق گۇلىنە 1 ليتر ىستىق سۋ قۇيىپ، باياۋ وتتا 5-7 مينۋتتاي قايناتىپ نەمەسە تەرموسقا قۇيىپ تۇندىرۋ كەرەك. سۋىعان سوڭ، ءسۇزىپ، الىنعان تۇنبامەن شاشتى كۇندەلىكتى شايىپ تۇرۋ قاجەت، ءبىراق سۇلگىمەن سۇرتپەڭىز. 1-2 اپتادان سوڭ، شاش قۇلپىرىپ، جىبەكتەي نازىك بولادى.

مەكسيكا ءادىسى. مەكسيكا قىزدارى شاش كۇتىمىندە الوە وسىمدىگىن ەرەكشە قاستەرلەيدى. ونىڭ قۇرامىندا قۇرعاق جانە زاقىمدانعان شاشقا قاجەتتى ەمدىك دارۋمەندەر قوسپاسى جيناقتالعان. بۇگىنگى تاڭدا الوە شىرىنى كوپتەگەن سۋسابىندار، بالزامدار مەن ماسكالار قۇرامىندا كوپ كەزدەسەدى.

ەگەر ۇيدە الوە وسىرسەڭىز، شاشقا ارنالعان تۇنبا جاساۋعا بولادى. دەگەنمەن الوەنىڭ جاسى 3-4 جىلدان كەم بولماۋى كەرەك. تۇنبانى دايىنداماس بۇرىن الوەنى ەكى كۇن شاماسىندا سۋارماۋ كەرەك. الوەنىڭ تومەنگى جانە ورتاڭعى جاپىراقتارىن پايدالانعان ءجون، سەبەبى ولاردىڭ شىرىنى مول بولادى.

تىكەندەرىن مانيكيۋرلىك قايشىمەن نەمەسە وتكىر پىشاقپەن جايمەن الىپ تاستاۋ قاجەت. جاپىراقتارىن كەسىپ الىپ، قايناعان سۋمەن جاقسىلاپ جۋامىز. جىڭىشكە بولىكتەرگە ءبولىپ، داكەگە مۇقيات وراپ، شىرىنىن سىعىپ الامىز. بۇل تۇنبانى شاشتى تازالاپ جۋىپ العان سوڭ، شايۋ كەزىندە قولدانادى.

ۋكراين ءتاسىلى. ۋكراين حالقىنىڭ نازىك جاندىلارى ەرتە زاماننان بەرى شاشتىڭ بەرىكتىگىن نىعايتۋ ءۇشىن ورمان جاڭعاعىنىڭ مايىن (لەشينا) پايدالانعان. شاشتى جۋار الدىندا ورمان جاڭعاعىنىڭ مايى مەن جۇمىرتقانىڭ سارۋ ۋىزىن قوسىپ ارالاستىرادى، وسى قوسپانى شاشتىڭ تۇبىنە جاعادى. 15 مينۋتتان كەيىن تازالاپ، جۋىپ تاستايدى.

ورىستار ءادىسى. ورىس حالقى ەمدىك شوپتەردى ەرەكشە باعالاعان. تاماققا قوسۋعا دا، جارانى ەمدەۋدە دە، سونىمەن قاتار، قىز-كەلىنشەكتەر اسەمدىك ءۇشىن دە پايدالانا بىلگەن. شاشتى نىعايتۋ ءۇشىن شوپتەردەن جاسالعان ارنايى تۇنبالار قايناتقان. 20 گرام تۇيەجاپىراق تامىرى، 20 گرام ءيىر، 10 گرام كالەندۋلا گۇلى، 15 گرام قۇلماق (حمەل) دايىندايدى. ۇستىنە 1 ليتر قايناعان سۋ قۇيىپ، قاقپاعىن مىقتاپ جاۋىپ، 2 ساعات تۇندىرىپ قوياسىز. سۋىعان سوڭ، ءسۇزىپ الىپ، وسى تۇنبامەن جاتار الدىندا شاشتى جۋۋ كەرەك.

ءوزىمىزدىڭ ەجەلگى ءتاسىل. ورتا ازيادا شاش كۇتىمىنە ەرتە زاماننان بەرى اشىعان ءسۇتتىڭ ءتۇر-ءتۇرىن پايدالانعان. شاشقا ۇيىعان ءسۇت، ىركىت نەمەسە ايراندى مولىراق جاعىپ، پوليەتيلەندى تەلپەك كيىپ، سىرتىنان تۇكتى قالىڭ سۇلگىمەن وراپ قويادى. 20 مينۋت وتكەن سوڭ، ماسكانى جىلى سۋمەن جاقسىلاپ جۋىپ تاستايدى. شاشقا ارنالعان باسقا دا ايران ماسكالارى بار.