جاقىندا «جاۋجۇرەك ەرتۇعرىل» اتتى سەريال كورەرمەنگە جول تارتپاق
«جاۋجۇرەك ەرتۇعرىل» 31 - ارنادان كورسەتىلەتىن بولادى.
11-12 - عاسىرداعى ءىرىلى- ۇساق مەملەكەتتەردىڭ، بيلىكتەگى اۋلەتتەردىڭ جۇرگىزگەن ساياساتى، يسلام تاريحىندا وراسان زور ورنى بار وسمان يمپەرياسىنىڭ جەر ءۇشىن، ءدىن ءۇشىن شايقاستارى. «جاۋجۇرەك ەرتۇعرىل» تەلەحيكاياسىندا ءدال وسى كارتينالار سۋرەتتەلەدى. سونىمەن قاتار سەريال، ۇلى دالا توسىنەن انادولىعا كوشىپ، قونىس تەپكەن «قايى» تايپاسىنان شىققان، اتى ءماشھۇر سۇلەيمەن سۇلتاننىڭ ارعى اتاسى ەرتۇعرىلمەن تانىستىرۋدى مۇرات تۇتادى. بۇل تۇرىك سەريالىنىڭ تۇسىرىلۋىنە قازاقستاندىق كاسكادەرلار دا ۇلكەن ۇلەس قوسقان.
رايم مۋرادوۆ، «Raim Nomad Pro» توبىنىڭ كاسكادەرى:
- سەريالدىڭ ادەمى شىعۋىنا بارىمىزدى سالدىق. ءتۇرلى توبەلەستەر، اتتىڭ ۇستىنەن قۇلاۋ، قىلىش جانە وزگە دە قارۋلارمەن جاقسى جۇمىس ىستەي الدىق. تۇركياداعى اكتەرلەر جۇمىسىمىزدى جوعارى باعالادى. سەريالدىڭ سسەناريى دە تاماشا. سول كەزەڭنىڭ تاريحىن، مادەنيەتىن كورەرمەنگە ەش قيىندىقسىز جەتكىزە الاتىن تەلەحيكايا.
ارنامىزدان كورسەتىلەتىن تەلەتۋىندىنىڭ بۇگىن «چاپلين» كينوتەاترىندا العاشقى سەرياسى كورسەتىلدى. تەلەحيكايانى تاماشالاۋعا ارنايى كەلگەندەر كينوكارتيناعا جوعارى باعا بەردى. اسىرەسە سول كەزەڭنىڭ مادەنيەتى، تۇرمىس تىرشىلىگى شەبەر سۋرەتتەلگەن سسەناريىنە، رەجيسسەرلىق جۇمىسقا ءتانتى بولدىق دەيدى كوپشىلىك.
تەلەحيكايانىڭ العاشقى سەرياسى كورسەتىلىپ بولعاننان كەيىن، كينوتەاترعا كەلگەندەر اراسىندا 31 - تەلەارنا ۇسىنعان سىيلىقتار ويناتىلدى. ال باس جۇلدەنى قانجىعاسىنا بايلاعان ازامات الەمنىڭ كەز كەلگەن ەلىن تاڭداپ الىپ، سول جەرگە بارۋعا تەگىن جولداما الدى.
شىڭعىس كاپين، جۇلدەگەر:
- بۇگىن مەن كەرەمەت سىيلىققا قول جەتكىزدىم. وتە قۋانىشتىمىن. ازىرگە قاي ەلگە باراتىنىمدى شەشكەن جوقپىن. مۇمكىن «ەرتۇعرىل» سەريالى تۇسىرىلگەن جەرگە بارىپ قالاتىندا شىعارمىن. بولماسا اتا-اناما سىيلىق رەتىندە تارتۋ ەتەمىن.
«جاۋجۇرەك ەرتۇعرىل» كارتيناسىنىڭ العاشقى سەرياسى ناۋرىزدىڭ 28 - جۇلدىزىندا ساعات 22:00 قازاق تىلىندە كورسەتىلەدى. ال ورىس ءتىلدى اۋديتوريا تاريحي تۋىندىنىڭ تۇساۋكەسەرىن 29 - ناۋرىزدا ساعات 19 - دا كورە الادى.
31 - ارنا
