ە و- مەن جاڭا كەڭەيتىلگەن كەلىسىم قازاقستاننىڭ ۇلتتىق ۇستانىمىنا ساي كەلەدى - ە. ىدىرىسوۆ

 استانا. قازاقپارات - بۇگىن ق ر پارلامەنتى سەناتىنىڭ جالپى وتىرىسىندا ق ر سىرتقى ىستەر ءمينيسترى ەرلان ىدىرىسوۆ وسىلاي مالىمدەدى.

جالپى وتىرىستا سىرتقى ساياسات ۆەدومستۆوسىنىڭ باسشىسى «ءبىر جاعىنان قازاقستان رەسپۋبليكاسى مەن ەكىنشى جاعىنان ەۋروپالىق وداقتىڭ جانە وعان مۇشە مەملەكەتتەرىنىڭ اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسى بويىنشا بايانداما جاساعان بولاتىن.

ەسكە سالا كەتەيىك، كەلىسىم قازاقستان پرەزيدەنتى ن. نازاربايەۆتىڭ 2008 - جىلعى ق ر سىرتقى ىستەر مينيسترلىگىنىڭ كەڭەيتىلگەن القا وتىرىسىندا بەرگەن تاپسىرماسىنا سايكەس ازىرلەنگەن. قۇجاتقا 2015 -جىلعى 21 - جەلتوقساندا استانادا قول قويىلعان بولاتىن.

 ق ر سىرتقى ىستەر ءمينيسترى ەرلان ىدىرىسوۆتىڭ ايتۋىنشا، جاڭا كەلىسىم قازاقستان مەن ە و اراسىنداعى 1995 -جىلى قول قويىلىپ، 1999 - جىلى كۇشىنە ەنگەن قولدانىستاعى كەلىسىمدى الماستىرادى. ايتا كەتەرلىگى، قولدانىستاعى كەلىسىم ق ر مەن ە و اراسىنداعى ىنتىماقتاستىقتى دامىتۋ اياسىنداعى ءوزىنىڭ ءرولىن تولىق اتقاردى.

 «جاڭا كەلىسىم قازاقستاننىڭ ەۋروپالىق وداقپەن قارىم قاتىناسىن جاڭا، بۇگىنگى زامان تالاپتارىنا ساي، ەكى تاراپتىڭ دا سەنىمىن اقتايتىن ىلگەرىمدى فورماتقا اۋىستىرۋدىڭ بەرىك قۇقىقتىق نەگىزىنە اينالادى. 9 بولىمنەن 287 باپتان، ساۋدا بولىگىندەگى جەتى قوسىمشادان تۇراتىن كەلىسىم ىنتىماقتاستىقتىڭ بارلىق باعىتىن قامتيدى»، - دەدى ە. ىدىرىسوۆ.

 ونىڭ سوزىنە قاراعاندا، قازىرگى ەۋروپالىق وداق - قازاقستاننىڭ اسا ماڭىزدى ءارى ءىرى ساۋدا ەكونوميكالىق ارىپتەسى جانە ينۆەستورى.

 تاۋار اينالىمىنىڭ ەلۋ پايىزى مەن تارتىلعان شەتەلدىك ينۆەستيتسيالاردىڭ ەلۋ پايىزدان استامى ە و ۇلەسىنە تيەسىلى. ال قازاقستاننىڭ ەو جالپى تاۋار اينالىمىنىڭ كولەمى 26- ورىندى يەلەنە وتىرىپ، ە و- نىڭ باستى ساۋدا ارىپتەستەرىنىڭ ىشىندە وتىز ءىرى مەملەكەتتەر قاتارىنا ەنەدى. كەلىسىم كەشەندى سيپاتتاعى قۇجات بولىپ تابىلادى.

 «كەلىسىم ساياسي ديالوگتى نىعايتۋدى ارتتىرادى، قاعيداتتى تۇردە جاڭا باعىتتار رەتىندە عارىشتىق قاۋىپسىزدىك، جاپپاي قىرىپ- جويۋ قارۋلارىن تاراتۋعا قارسى كۇرەس، تەرروريزمدى قارجىلاندىرۋعا قارسى ءىس- قيمىل، اتىس جانە جەڭىل قاراۋلاردىڭ تارالىمى، كيبەرقىلمىسقا قارسى شارالار، دەربەس مالىمەتتەردى قورعاۋ، مەملەكەتتىك قىزمەت سالاسى، كليماتتىڭ وزگەرۋى، قۇقىق قورعاۋ سالالارىن اتاپ وتۋگە بولادى. قۇجاتتا بوستاندىق، قاۋىپسىزدىك، ادىلەت جانە قاۋىپسىزدىكتى قامتاماسىز ەتۋ باعىتىنداعى ىنتىماقتاستىققا دا بارىنشا ءمان بەرىلىپ وتىر. ە و يننوۆاتسيالار، عىلىم جانە تەحنولوگيا، ءبىلىم جانە مادەنيەت ءوزارا ءىس قيمىل ودان ءارى دامىتىلادى.

«كەلىسىم ارقىلى قازاقستان ازاماتتارى ءۇشىن ۆيزالىق رەجىمدى جەڭىلدەتۋ، قازاقستاندى نارىقتىق ەكونوميكاسى بار مارتەبەسىن بەرۋ، ەلىمىزدىڭ اۆياكومپانيالارىن ەو شەكتەۋ تىزىمىنەن شىعارۋ جۇمىستارى جاندانا تۇسەدى.

قازاقستان مەن ە و اراسىنداعى جاڭا كەلىسىم ەلىمىزدىڭ تاڭداپ العان ۇلتتىق باعىتىنا، «قازاقستان-2050» ستراتەگياسىنا، «نۇرلى جول» باعدارلاماسىن ىسكە اسىرۋعا، بەس ينستيتۋتتىق رەفورمانى، ۇلت جوسپارىنا تولىقتاي سايكەس كەلەدى»، - دەدى ۆەدومستۆو باسشىسى.

اۆتور: قانات مامەتقازى ۇلى