كەرەك كەڭەس: بالاڭىز ءۇشىن مەكتەپكە ءجيى شاقىرتا بەرمەۋدىڭ امالى تابىلدى

استانا. قازاقپارات - بىلىكتى پەداگوگ: «بالادان اسقان پسيحولوگ جوق» دەپ تۇجىرىمداپتى. شىنىندا دا بالانىڭ ىشكى سەزىمىنە ۇڭىلە الىپ ءجۇرمىز بە؟ ەگەر بالاعا اتا- اناسى نازار اۋدارماي قويسا، وندا بالا ولاردى وزىنە قاراتۋ ءۇشىن ءتۇرلى امالداردى ويلاپ تابۋى مۇمكىن،

 دەپ جازادى namys.kz پورتالى «نازار اۋدارماساڭىز ءوزى ءماجبۇر ەتەدى» تاقىرىبەن شىققان ماقالادا.

مىنا ءبىر مىسالدىڭ ءوزى سونىڭ ءبىر دالەلى سىڭايلى. ۇزاق جىل جاتاقحانا باسقارعان ۇستاز ايتادى: «ينتەرناتتا كىلەڭ بۇزاقىلىق جاسايتىن ءبىر بالا بولدى. تاربيەگە تۇك كونبەيدى. ءاربىر ءتارتىپ بۇزعان سايىن اتا- اناسىن شاقىرتامىز دا جاتامىز. ولاردىڭ دا ىعىرى شىقتى، ءبىز دە ابدەن شارشادىق. اكە- شەشەسى كەلگەن سايىن بالا «ەندى ەشقاشان قايتالامايمىن» دەپ ۋادەنى ءۇيىپ- توگەدى. ءبىراق، ءبىرتالاي ۋاقىتتان كەيىن باياعى اۋەنىنە قايتا باسادى.

 بىردە سول بالانى وڭاشا وتىرعىزىپ قويىپ: «وسى ساعان نە جەتپەيدى؟ نەگە تىنىش جۇرمەيسىڭ؟» دەپ قادالا سۇرادىم. سوندا الگى بالا: «مەن تىنىش جۇرگەندە اكە- شەشەمنىڭ مەكتەپكە كەلگەنىن كوردىڭىز بە؟» وزىمە سۇراق قويدى. شىنىندا دا ول كەزدە اتا- اناسى مەكتەپ- ينتەرناتقا مۇلدە باس سۇقپايتىن ەدى. «جوق» دەپ جاۋاپ بەردىم. ال، وقۋشىم بولسا: «كوردىڭىز بە ەندى قالاي كەلىپ جۇرگەنىن؟» دەپ ءوز ىسىنە ماساتتانعانداي سويلەدى. ءبىز ونىڭ نە ءۇشىن بۇزاقىلىق جاساي بەرەتىنىن سوندا عانا تۇسىندىك» دەيدى.

ارينە، بۇل كوپ مىسالدىڭ ءبىرى عانا. سونىڭ وزىندە ەلەۋسىز قالدىرۋعا بولمايتىن مىسال. اسىرەسە، بالانىڭ كوپشىلىگى اتا- اناسىنىڭ مەكتەپكە كەلىپ، ءوزىنىڭ ساباعىنا قاتىسىپ، سىنىپتاستارىنا تانىلۋىن ىشتەي قاتتى قالايدى ەكەن. سوندىقتان، اتا- انا ۋاقىت تاۋىپ، بەلگىلى ءبىر ۋاقىتتاردا مەكتەپكە بارۋدى داعدىعا اينالدىرۋى ءتيىس. ۇلكەندەر ءۇشىن ول ەلەۋسىز شارۋانىڭ ءبىرى عانا، ال، بالا ءۇشىن ونىڭ ماڭىزى وتە زور ەكەن...