ناسا حالىقارالىق عارىش ستانساسىنىڭ جۇك تاسىعىش مودۋلىنە ءورت قويماق

استانا. قازاقپارات - ناسا عارىش اگەنتتىگى عارىشتاعى ءىرى ءورتتىڭ سيپاتتارىن انىقتاۋ ءۇشىن وربيتادا حالىقارالىق عارىش ستانتسياسىنىڭ (ح ع س) جۇك تاسىعىش مودۋلىنە ءورت قويىپ، تاجىريبە جاساپ كورمەك، دەپ حابارلاندى اگەنتتىكتىڭ رەسمي سايتىندا.

جوباعا Saffire دەگەن اتاۋ بەرىلدى.

ح ع س مودۋلى 23- ناۋرىزدا ۇشىرىلماق، ول عارىشكەرلەرگە كەزەكتى جۇكتى جەتكىزگەن سوڭ جوسپار بويىنشا وتقا ورانۋى ءتيىس. مودۋل ءورتتىڭ بارلىق سيپاتتارىن ولشەيتىن قۇرىلعىلارمەن جابدىقتالعان. ياعني، وتتىڭ تەمپەراتۋراسى، جايىلۋ جىلدامدىعى، كولەمى ولشەنەدى.

جوبانىڭ باس مەنەدجەرى Saffire گارري راف بۇل عارىشتا قولدان جاسالعان ەڭ ۇلكەن ءورت بولاتىنىن جانە ونى زەرتتەۋ عارىش كەمەلەرىندە ءورت بولعان جاعدايدا دايىن بولۋ ءۇشىن وتە قاجەت ەكەنىن ايتتى.

عالىمدار كاپسۋلا جەر اتموسفەراسىنا ەنگەن ساتتە تولىقتاي جويىلاتىنىن ءمالىم ەتتى.