الماتى پوليتسياسى قىلمىسكەرلەردى الەۋمەتتىك جەلى كومەگىمەن ىزدەستىرمەك

الماتى. قازاقپارات - بۇگىن الماتى پوليتسياسىنىڭ ۆكونتاكتە الەۋمەتتىك جەلىسىندە ءىز-ءتۇسسىز جوعالىپ كەتكەندەر مەن قىلمىستى ادامداردى ىزدەستىرۋگە مۇمكىندىك بەرەتىن جەكە پاراقشاسى اشىلدى. بۇل تۋرالى بۇگىن الماتى قالالىق ءى ءى د باسپا ءسوز قىزمەتىنەن حابارلادى.

«الماتى - ىزدەستىرۋ» رەسۋرسى ماڭىزدى الەۋمەتتىك جەلىلەردىڭ بىرىندە قۇرىلدى جانە ونى باسقارۋعا وتە وڭاي.

 «ءىز-ءتۇسسىز جوعالىپ كەتكەن جانە قىلمىستى ادامدار تۋرالى اقپاراتتاردى جاريالاۋعا ارنالعان جاڭا اقپاراتتىق ورتا وڭ ناتيجەلەرگە قول جەتكىزۋگە سەپتىگىن تيگىزەدى. بۇل پاراقشا دەپارتامەنتتىڭ ءار ءتۇرلى قىزمەتتەرى مەن بولىمشەلەرىنەن ادام ىزدەستىرۋ جايىنداعى مالىمەتتەردىڭ كەلىپ تۇسۋىنە قاراي جاڭارتىلىپ وتىرادى. وندا ءاربىر جوعالعان ادامنىڭ فوتوسۋرەتى، ساۋالنامالىق دەرەكتەرى، سونداي-اق، قاي كۇنى، قاي ساعاتتا جانە شامامەن قاي جەردە جوعالعانى، ەرەكشە بەلگىلەرى جانە ءتىپتى كيگەن كيىمى تۋرالى دا مالىمەتتەر جاريالانادى. ولاردان باسقا، ىزدەستىرۋ ءىسى ءوندىرىسىن جۇرگىزىپ جاتقان لاۋازىمدى تۇلعانىڭ بايلانىس تەلەفونى جازىلادى. ازاماتتار وسى تەلەفوندار بويىنشا حابارلاسىپ، اقپاراتتارىمەن بولىسە الدى.

ءبىز، الەۋمەتتىك جەلىلەردىڭ دامىپ جاتقاندىعىن ەسكەرە وتىرىپ، ينتەرنەت پايدالانۋشىلاردى كەڭىنەن قامتىپ، قىلمىسكەرلەر مەن جوعالىپ كەتكەندەردى ىزدەستىرۋ اۋماعىن كەڭەيتكىمىز كەلەدى. قوعامدا بەلسەندى ازاماتتىق ۇستانىمى بار ازاماتتارىمىز جەتەرلىك دەپ سانايمىز. ولاردىڭ كەلتىرىلگەن دەرەكتەر بويىنشا بىلەتىن ماعلۇماتتارىن بىزگە بەرە الاتىندىعىنا سەنىمدەمىز»، - دەدى الماتى قالالىق ءى ءى د رەسمي وكىلى، پوليتسيا مايورى سالتانات ازىربەك.

بۇل جەردە دەپارتامەنتىڭ رەسمي سايتىندا بىرنەشە جىلدان بەرى «ىزدەستىرۋ» ايدارىنىڭ جۇمىس ىستەپ كەلە جاتقاندىعىن ايتا كەتكەن ءجون. ول ق ر ءى ءى م كريمينالدى پوليتسيا كوميتەتىنىڭ كۇشىمەن تۇراقتى تۇردە جاڭارتىلىپ تۇرادى.

اۆتور: ايبوتا جاپپاربەرگەن