قازاقستان قازىناسىنداعى بيۋدجەت قارجىسىن حالىققا جاپپاي تاراتىپ بەرۋى مۇمكىن

استانا. قازاقپارات - بيۋدجەت اقشاسى جۇرتقا جاپپاي تاراتىلۋى مۇمكىن، دەپ حابارلايدى «ك ت ك» ارناسى.

جاقىندا پرەزيدەنت نۇرسۇلتان نازاربايەۆ ۇكىمەتكە «بازالىق تابىس» دەپ اتالاتىن جوبانى قاراستىرۋدى تاپسىرعان بولاتىن. ول ەل ازاماتتارىنىڭ بارلىعىنا كورسەتىلەتىن كومەك. ەگەر جوبا ەنگىزىلسە، الەۋمەتتىك تولەمدەر ياعني جاردەماقى، زەينەتاقى، شاكىرتاقى جويىلىپ، ونىڭ ورنىنا ەلىمىزدىڭ 17 ميلليون حالقى اي سايىن بەلگىلى ءبىر مولشەردە اقشا الىپ تۇرادى. دەسە دە، قازىرگى ەكونوميكالىق جاعدايدا بۇل قازىناعا اۋىر تيەرى انىق دەيدى ساراپشىلار. ءارى جۇمىسسىزدىق دەڭگەيى دە كۇرت ءوسۋىپ كەتۋ قاۋپى بار.

بازالىق تابىس - ەل بيۋدجەتىنە تۇسكەن پايدادان جۇرتتىڭ ءوز ۇلەسىن الۋى دەگەن ءسوز. ياعني، «باي»، «كەدەي» دەپ بولمەي بارلىعىنا بىردەي اي سايىن تولەنەتىن اقشا. قازىر الەمنىڭ بىرنەشە دامىعان مەملەكەتىندە وسىنداي تولەمدەر تاجىريبە رەتىندە ىسكە اسىرىلىپ جاتىر. ەندى قازاقستاندا وسى قازىناعا تۇسكەن ارتىق تابىستى حالىققا ءبولىپ بەرمەك ويدا.

ەلىمىزگە بازالىق تابىس جوباسى ەنگىزىلسە، بارلىق الەۋمەتتىك تولەمدەر: زەينەتاقى، شاكىرتاقى مەن جاردەماقى بولمايدى. ونىڭ ورنىنا مەملەكەت ءوز ازاماتتارىنىڭ بارلىعىنا اي سايىن جالاقى بەرگەندەي اقشا تولەپ تۇرادى. ءتىپتى، ول ءۇشىن جۇمىس ىستەۋدىڭ قاجەتى جوق.

دەسە دە مۇنداي باستامانى مينيسترلىكتىڭ ءوزى دە اسا قولداپ وتىرعان جوق. ويتكەنى، بۇل جۇرتتى جالقاۋلىققا ۇيرەتەدى. ويتكەنى، اي سايىن جايدان-جاي اقشا تۇسسە جۇمىسسىزداردىڭ سانى ارتاتىنى انىق. ءبىراق بازالىق تابىستى مۇقيات زەرتتەۋدى تاپسىرعان ەلباسى مەملەكەت موينىنا ماسىل بولعانداردى شەكسىز جارىلقاي المايتىنىن تالاي ەسكەرتكەن.

بازالىق تابىستىڭ پايدالى جاقتارى دا جوق ەمەس. مىسالى، بۇل جوبا ناميبيا مەن ينديا اۋىلدارىنا ءساتتى جۇزەگە اسقان. ياعني، جۇرتقا اي سايىن اقشا تاراتىپ وتىرىپتى. ناتيجەسىندە ەشكىم جۇمىسىن تاستاماعان. كەرىسىنشە، حالىقتىڭ جاعدايى ارتىپ، قىلمىس ازايعان. ءبىراق قازاقستان مۇنداي وزگەرىسكە دايىن ەمەس دەيدى ساراپشىلار.

«ەلىمىزدە 4 ميلليون تۇرعىن عانا جۇمىسقا جارامدى. ەرتەڭ بارلىعىنا اقشا تاراتساق جۇمىسسىزدىق ارتىپ، بۇل ەكونوميكاعا اۋىرتپالىق تۇسىرەدى. ونىڭ ۇستىنە داعدارىس كەزىندە بيۋدجەت ارتىق شىعىندانا المايدى»، - دەيدى ساراپشى شولپان ايتەنوۆا.

دەسە دە، ۇكىمەت 17 ميلليون حالىقتى ۇمىتتەندىرىپ قويعان جوبانى بۇگىن ەرتەڭ ىسكە اسىرعالى جاتقان جوق. ءار ادامعا قانشا اقشادان تيەتىنى دە بەلگىسىز. ازىرشە، پرەزيدەنتتىڭ پرەمەر-مينيستر كارىم ماسىموۆكە جۇكتەگەن تاپسىرماسى بويىنشا، بۇل باستامانىڭ ءتيىمدى جانە ءتيىمسىز تۇستارى ءجىتى قاراستىرىلىپ جاتىر.