پاۆلودارلىق كاسىپكەر قىتايعا، دۋبايعا قىمىز جىبەرەدى

استانا. قازاقپارات - پاۆلودار قالاسىنداعى ءىرى قىمىز ءوندىرۋشى «ساعىپ» شارۋا قوجالىعى بىرىككەن اراب امىرلىكتەرىندەگى كاسىپكەرلەردەن ءبىر توننا شيپالى سۋسىنعا تاپسىرىس الدى، دەپ حابارلايدى pavlodarnews.kz.

- دۋبايداعى ءىرى ساۋدا جەلىسىنە قىمىز تاسىمالداۋ جونىندە كەلىسىم-شارت جاساپ، لوگيستيكالىق ماسەلەلەردى رەتتەپ جاتىرمىز. جۋىردا قىمىزدىڭ جارتى تونناسى ماسكەۋدەگى «باۋىرساق» سۋپەرماركەتتەر جەلىسىنە جەتكىزىلدى. سونداي-اق، قىتاي ەلىنىڭ نارىعىنا التى توننا قىمىز جىبەرگەن بولاتىنبىز.

بۇدان باسقا، پەكين قالاسىنداعى ءبىر كاسىپكەردەن تاپسىرىس الدىق. شارۋاشىلىقتا 200 گە جۋىق بيە بار، - دەيدى تولەۋ قۇشمانوۆا.

شارۋا قوجالىعى يەسىنىڭ ايتۋىنشا، مۇندا تاۋلىگىنە 800 ليتر قىمىز بەن 100 كەلى قۇرت ازىرلەنەدى. بۇگىندە ءوندىرىس تولىق اۆتوماتتاندىرىلعان جۇيەگە كوشكەن. بارلىعى 15 كاسىبي مامان جۇمىس ىستەيدى.