بوكستان قازاق باپكەرى رەسەيدىڭ ەكى دۇركىن چەمپيونىن جاتتىقتىراتىن بولدى

استانا. قازاقپارات - قازاقستاندىق بوكس باپكەرى سەرىك بەكتۇرعانوۆ ەكى دۇركىن رەسەي چەمپيونىن جاتتىقتىراتىن بولدى.

بۇل تۋرالى جاس وركەن حابارلايدى.

رەسەيدە گاسان گيمباتوۆ دەگەن 22 جاسار بوكسشى بار. حالىقارالىق دارەجەدەگى سپورت شەبەرى. روستوۆتا دۇنيەگە كەلگەن. شىققان تەگى داعىستاندىق. ۇلتى - اۆار. وسى بوكسشى جاقىندا باپكەرىن اۋىستىردى. گاساندى بۇدان بىلاي قازاقستاندىق مامان سەرىك بەكتۇرعانوۆ جاتتىقتىراتىن بولدى.

گاسان اسا اۋىر سالماقتا ونەر كورسەتەدى. رەسەيدىڭ ەكى دۇركىن چەمپيونى. العاش رەت 2013-جىلى حاباروۆسكىدە وتكەن رەسەي بىرىنشىلىگىنىڭ فينالىندا ماگومەد وماروۆتى ۇتىپ كوزگە تۇسكەن. ماگومەد 2011-جىلعى ەۋروپا چەمپيونى، لوندون وليمپياداسىنا قاتىسقان. قازان قالاسىندا وتكەن ۋنيۆەرسيادا ويىندارىنىڭ جەڭىمپازى. وسىنداي اتاقتى قارسىلاسىنان باسىم تۇسكەن 20 جاستاعى تالانتتى بوكسشى كوپشىلىك نازارىن اۋدارادى. ودان كەيىن بىلتىر باكۋدە ەۋروپا ويىندارىندا كۇمىس جۇلدەمەن ورالدى.

گاسيموۆتى وسى ۋاقىتقا دەيىن كازيم حاليلوۆ جاتتىقتىرىپ جۇرگەن ەدى. بيىلعى جىلى ول قازاقستاندىق سەرىك بەكتۇرعانوۆپەن بىرگە جۇمىس ىستەۋدى ۇيعارىپتى.

«ەندى مەن سەرىك بەكتۇرعانوۆپەن بىرگە جۇمىس ىستەيمىن. ول وتە مىقتى باپكەر، جاقسى پسيحولوگ جانە ديەتولوگ. بۇل باپكەر ماعان قازىر ەڭ قاجەتتى شارالاردىڭ ءبارىن جاساي الاتىن تاجىريبەلى مامان»، - دەپ بىلەمىن دەيدى بوكسشىنىڭ ءوزى.

بوكسشىنىڭ ءدال قازىرگى ماقساتى ريو-دە جانەيرو وليمپياداسىنا جولداما الۋ.

«مەنىڭ الدىمدا تۇرعان ەڭ باستى ماقسات وليمپيادا جولداماسىن بەرەتىن ليتسەنزيالىق جارىسقا قاتىسۋ. مۇنداي جارىس ەكى رەت بولادى. ءبىرىنشى تۇركيادا وتەدى. وعان ماكسيم بابانين بارادى. ال ەكىنشى باكۋدە بولادى. ەگەر بابانين تۇركيادا جەڭىلىپ كەلسە، وندا مەن باكۋدە جولداماعا تالاساتىن بولامىن»، - دەيدى گاسيموۆ.

ەگەر گاسيموۆقا مۇمكىندىك بەرىلسە، باپكەرى ەكەۋى ونى ءمۇلت جىبەرمەۋگە تىرىساتىنى انىق.

سەرىك بەكتۇرعانوۆ ەكى دۇركىن ازيا چەمپيونى داريعا شاكيموۆانىڭ جەكە جاتتىقتىرۋشىسى بولعان. سولتۇستىك قازاقستان وبلىسىنىڭ اعا باپكەرى قىزمەتىن اتقاردى ءبىر كەزدەرى. بىرنەشە قازاقستان چەمپيوندارىن دايىنداعان. وسى ۋاقىتقا دەيىن قازاقستاندىق بوكسشىلاردى دايىنداپ كەلگەن باپكەردىڭ اياق استىنان كورشى ەلدە جۇمىس ىستەۋى قىزىق كورىنەتىن شىعار. ءبىراق، ول ءوزى ءاردايىم جاڭا نارسە ۇيرەنۋگە قۇشتار ەكەنىن ايتادى.

«وسى ۋاقىتقا دەيىن كوپ تاجىريبە جيناقتادىم. مەنىڭ ۇيرەتەتىن ءتاسىلىم قازاق نەمەسە باسقا ەلدىڭ بوكس مەكتەپتەرىنە مۇلدەم ۇقسامايدى. ونى سيپاتتاپ بەرۋ قيىن. ءبىر كەزدەرى ءوزىم كۋبالىق اتاقتى باپكەر السيدەس ساگارامەن بىرگە جۇمىس ىستەگەنمىن. ول ءبىر جىلدارى الماتىدا تۇرعان بولاتىن. بۇل ماماننان كوپ نارسە ۇيرەندىم. ەكەۋىمىز اۋدارماشىنىڭ كومەگىنسىز سويلەسە بەرەتىنبىز. ونىڭ سوڭىنان جۇگىرىپ ءجۇرىپ، بارلىق جاتتىعۋ پروتسەسىن وزىمە جازىپ الدىم»، - دەيدى بەكتۇرعانوۆ.