شىعىس قازاقستاندا ورىس سىنىپتارىندا مەملەكەتتىك ءتىلدى تەرەڭ وقىتۋدى قولعا الادى

استانا. قازاقپارات - شىعىس قازاقستاندا ۇشتىلدىلىكتى دامىتۋدىڭ كەشەندى جوسپارى جۇزەگە اسىرىلۋدا.

ايماقتا 2019 -جىلعا دەيىن قازاق، ورىس، اعىلشىن تىلدەرىندە ءبىرىڭعاي وقۋ-ادىستەمەلىك كەشەنىن ەنگىزۋ جوسپارلانىپ وتىر. ءتىل پاندەرى مۇعالىمدەرىنىڭ كاسىبي بىلىكتىلىكتەرىن جوعارلاتۋ ماقساتىندا ارنايى كۋرستار ۇيىمداستىرىلادى. ايماق باسشىلىعى تىلدەردى وقىتاتىن مۇعالىمدەرگە قارجىلاي ۇستەماقى بەرۋ جولدارىن ويلاستىرعان.

وبلىس اكىمىنىڭ ورىنباسارى جاقسىلىق ومار «ش ق و اقپاراتتىق ورتالىعى» ايماقتىڭ كوممۋنيكاتسيالار ورتالىعىندا وتكىزگەن باسپا ءسوز كونفەرەنسياسىندا ايماق مەكتەپتەرىندە ۇشتىلدىلىكتى ەنگىزۋ 2016 -جىلدىڭ اقپانىندا ق ر ءبىلىم جانە عىلىم مينيسترلىگىنىڭ بۇيرىعىمەن ماقۇلدانعانىن مالىمدەدى.

سونىمەن قاتار شىعىس قازاقستان وبلىسى تاجىريبەلىك الاڭ رەتىندە انىقتالىپ، وبلىس مەكتەپتەرى العاشقى بولىپ اتالمىش وقىتۋ جۇيەسىنە كوشىرىلەدى.

- ءبىز بيۋدجەت قاراجاتىن مەكتەپتەردى قامتاماسىز ەتۋگە، مۇعالىمدەر جالاقىسىنا جۇمساعانمەن، ناتيجە جوق. وبلىس اكىمى دانيال احمەتوۆ وقۋشىلار ءبىلىم دەڭگەيىنىڭ جەتكىلىكسىزدىگىن ەسكەرىپ، 2019 -جىلعا دەيىن ايماق مەكتەپتەرىندە ۇشتىلدىلىكتى دامىتۋ بويىنشا كەشەندى جوسپاردى جۇزەگە اسىرۋدى تاپسىردى. اتالمىش قۇجات وقىتۋ مەن ساباق بەرۋدە جاڭا ۇردىسكە يە بولماق. ونى جۇزەگە اسىرۋ ءۇشىن 1300 ميلليون تەڭگە ءبولىندى، - دەدى جاقسىلىق ومار.

سونداي- اق، وبلىس اكىمىنىڭ ورىنباسارى قازاق، ورىس، اعىلشىن پاندەرىنىڭ مۇعالىمدەرى كوكتەمگى جانە جازعى ەڭبەك دەمالىستارىندا ءۇش ايلىق قايتا دايارلاۋدان وتەتىندەرىن ايتىپ ءوتتى. اعىلشىن ءتىلى مۇعالىمدەرىنىڭ كاسىبي بىلىكتەرىن جوعارلاتۋ ماقساتىندا شەتەلدىك ماماندار شاقىرىلادى.

وبلىستىڭ بارلىق مەكتەپتەرى ءبىرىڭعاي قازاق جانە اعىلشىن ءتىلى وقۋلىقتارىمەن قامتاماسىزداندىرىلادى. مەكتەپ بىتىرگەن تۇلەكتەر مەملەكەتتىك ءتىلدى ەركىن مەڭگەرۋگە مىندەتتەلىپ، سوعان قاجەتتى مەتوديكالىق ءادىسنامانىڭ ءبارى جاسالادى. ارنايى جۇمىس توبى ءبىلىم دەڭگەيلەرى بويىنشا ورىس ءتىلىن وقىتۋدىڭ ادىستەمەسىن دە دايىندايدى.

ساباق جوسپارىن وڭتايلاندىرۋ ارقىلى اعىلشىن ءتىلى ءپانىنىڭ ساعاتتارى ۇلعايتىلادى.

ارنايى كەشەندى جوسپاردا وزگە پاندەردىڭ مۇعالىمدەرىن دە ءۇش تىلدىلىككە ۇيرەتۋ جۇيەسى قاراستىرىلعان. گەوگرافيا، بيولوگيا، ماتەماتيكا، فيزيكا جانە وزگە پاندەر بويىنشا اعىلشىن تىلىمەن بىرىكتىرىلگەن وقۋ ماتەريالدارى دايىندالادى. بىرىكتىرىلگەن ماتەريالدار ءتۇرى قازاق تىلىندە ورىس سىنىپتارىندا، ورىس تىلىندە قازاق سىنىپتارىندا وقىتىلادى. بۇل قازاق ءتىلىن ۇيرەنۋدى جەدەلدەتەدى.

كەشەندى جوسپاردى جۇزەگە اسىرۋ قورىتىندىسى بويىنشا سويلەۋ، جازۋ، ەستۋ، تىڭداۋ سەكىلدى ءتىل داعدىلىعىن قالىپتاستىرۋدىڭ مۇمكىندىگى تۋادى.