ۇيالى تەلەفون ساتىپ الاردا نەنى ەستە ۇستاۋ قاجەت؟

استانا. قازاقپارات - قازىر تەلەفون ءسىزدىڭ الەۋمەتتىك جاعدايىڭىزدى انىقتايتىن كورسەتكىشكە اينالعانى راس.

سۋپەر سمارتفون ءۇشىن كوپشىلىگى بانكتەن نەسيە الۋعا دا دايار. ىستەن شىقسا قىرۋار قارجى بوسقا شىعىندالادى. قالاي دۇرىس تاڭداۋ جاساۋعا بولادى؟

سوڭعى ۋاقىتتا باعاسى قىمبات، ساپاسى كەرەمەت دەگەن تەلەفونىم بۇزىلىپ قالدى دەپ شاعىمداناتىندار كوپ. تۇتىنۋشىلار تەلەفوندى ساۋدا ورتالىعىنا بارىپ اۋىستىرىپ الۋعا، ساپاسىز تاۋاردى قايتارىپ بەرۋگە تىرىسىپ باعادى. ماسەلە ۋشىعىپ جاتسا، تۇتىنۋشىلار قۇقىعىن قورعاۋمەن اينالىساتىن ۇيىمنان كومەك سۇرايدى. ول جەردە ق ر تۇتىنۋشىلار قۇقىعىن قورعاۋ تۋرالى زاڭنىڭ اياسىندا كەڭەس بەرىلەدى. دەسە دە ساتۋشىلار زاڭ تالابىن ورىنداۋعا كوپ جاعدايدا قۇلىقسىز. بۇل جاعدايدىڭ ورىن الۋىنا تۇتىنۋشىنىڭ ءوزى كىنالى. سەبەبى ساتىپ الۋدى راستايتىن قۇجاتتاردى المايدى. تۇبىرتەك تە، كەپىل تالوندارى دا جوق. قولىڭىزعا قۇجات الماساڭىز، باسىڭىزدى داۋعا ءوزىڭىز تىققانىڭىز.

تۇبىرتەكتىڭ قانداي قاجەتتىلىگى بار؟

بىرىنشىدەن، تۇبىرتەكتە ساتۋشىنىڭ بارلىق رەكۆيزيتتەرى كورسەتىلەدى. قانداي دا ءبىر ماسەلە تۋىنداسا، قينالماي تاباسىز. ەكىنشىدەن، تۇبىرتەك - ايعاق. ياعني ءدال وسى جەردەن العانىڭىزدى دالەلدەيدى. كەپىل قاعازىن دا ساتىپ العانىڭىزدى راستايتىن قۇجات دەۋگە بولادى. ءبىراق تالوندى الار كەزدە مۇقيات قاراپ الىڭىز. ونداعى ءموردىڭ بار- جوعىن، بولسا قانداي ەكەنىنە ءمان بەرۋ كەرەك. تەك قانا «اقشاسى تولەندى» دەگەن جازۋ ەمەس، ج ش س، ج ك دەگەن تولىققاندى ءمور تۇرۋى ءتيىس. بۇل وتە ماڭىزدى! سەبەبى موردە ساتۋشىنىڭ بارلىق مالىمەتتەرى بار. سوندىقتان تاۋار ساتىپ العاندا وزىمەن بىرگە كەلگەن قاعازداردى لاقتىرىپ تاستاماڭىز! قۇرىلعى ىستەن شىققان جاعدايدا سىزگە كومەككە كەلەتىن سول قۇجاتتار عانا. ارينە تۇبىرتەك پەن كەپىل تالونىن جوعالتىپ الساڭىز، كۋاگەرلەردىڭ كومەگىمەن دالەلدەپ بەرە الاسىز. ءبىراق ەڭ ىڭعايلىسى - قۇجاتتاردى لاقتىرماۋ. ۋاقىتىڭىزدى دا، جۇيكەڭىزدى دە ساقتاپ قالاسىز.

ۇيالى تەلەفون الار ساتتە بىرگە كەلەتىن جابدىقتاردىڭ تۇگەل ەكەندىگىنە كوز جەتكىزىڭىز. قاي زات بار، قايسىسى جوعىن قاراپ شىعىڭىز. بۇزىلىپ قالعاندا دۇكەنگە قايتا باراسىز. دۇكەن جابدىقتاردىڭ ءبارىن تۇگەندەيدى. بىرەۋى جەتىسپەسە، ساتىپ العان ۋاقىتتا ونىڭ بولماعانىن دالەلدەۋ مۇمكىن بولماي قالادى.

ەسىڭىزدە بولسىن، تۇتىنۋشىلار قۇقىعىن قورعاۋ تۋرالى زاڭعا سايكەس، ىستەن شىققان تەلەفوندى ءدال سونداي جۇمىس ىستەپ تۇرعان تۇرىنە اۋىستىرا الاسىز. سونداي-اق، جوندەۋ جۇمىستارىنا كەتەتىن شىعىندى دا تالاپ ەتە الاسىز. ەگەر قالاساڭىز، بۇزىلعان تەلەفوننىڭ اقىسىن قايتارىپ بەرۋدى سۇراي الاسىز. ءبىراق تەك ءبىر نۇسقانى عانا تاڭداۋ قاجەت.

دەگەنمەن تەلەفوننىڭ جوندەۋگە كەلمەيتىنىن دالەلدەۋ كەرەك. ءسىزدىڭ تىكەلەي قاتىسۋىڭىسسىز بۇزۋىلۋىپ قالۋى دا مۇمكىن. مۇنداي زەرتتەۋ جۇمىستارىن سەرۆيس ورتالىقتارى مەن اككرەديتاتسيالانعان مەكەمەلەر وتكىزەدى. ەگەر تەلەفوننىڭ بۇزىلۋىنا تۇتىنۋشىنىڭ كىناسى جوق بولىپ شىقسا، ساتۋشى تەلەفوندى اۋىستىرىپ بەرەدى نە اقشانى قايتارادى. ەگەر تالداۋ ناتيجەسىنە كۇماندانىپ تۇرساڭىز، ءوز قالتاڭىزدان اقشا شىعارىپ، باسقا ورتالىققا تەكسەرىس جاساتساڭىز بولادى. تالداۋ ناتيجەسى مەن قاجەتتى قۇجاتتاردى قولىڭىزعا الىپ، سوتقا بارعاندا جەڭىسكە جەتۋ مۇمكىندىگىڭىز جوعارى بولادى.

قاعازباستىلىقتان باس تارتقىڭىز كەلسە دە، قاعاز - كەرەك! قانداي قۇجات بولماسىن، لاقتىرۋعا اسىقپاڭىز.

دەرەككوزى: 7kun.kz