قازاقستاننىڭ وسىمدىك مايى قىتاي نارىعىن شىعارىلادى
بۇل تۋرالى «اتامەكەن» ۇلتتىق كاسىپكەرلەر پالاتاسىنىڭ باسپا ءسوز قىزمەتى حابارلادى.
كاسىپكەرلەر پالاتاسى ازىق- تۇلىك كوميتەتى حاتشىلىعىنىڭ باسشىسى ەربول ەسەنەيەۆتىڭ ايتۋىنشا، بۇگىنگى دەيىن قازاقستاننان ماي ەكسپورتى نەگىزىنەن شيكىزات تۇرىندە جونەلتىلىپ كەلگەن بولاتىن. قىتايلىق وڭدەۋشىلەر راپس، كۇنباعىس، سويا تۇقىمىن الىپ، ونى وڭدەپ، ءونىم الاتىن.
«ەندى قازاقستاننىڭ تاريحىندا العاش رەت 2 مىڭ توننا ماي جونەلتكەلى وتىرمىز. بۇل ارينە الدەقايدا ءتيىمدى. ماسەلەن، ءبىز بۇعان دەيىن تۇقىمدى نەگىزىنەن قىتايعا ورتاشا قۇنى كەلىسىنە 100-125 تەڭگەدەن ەكسپورتتاساق، مايدىڭ كەلىسى 300-315 تەڭگەدەن اينالادى»، - دەيدى ول. ونىڭ ايتۋىنشا، اتالعان ءونىم بۇگىنگى كۇنى الماتى قالاسىندا 88 كونتەينەرگە تيەلگەن، ناۋرىزدىڭ 20-سىنا قاراي تەمىرجول قۇرامىمەن جونەلتىلۋ ءۇشىن دايىن تۇر.
«قىتاي قازاقستاننان وسىمدىك مايلارىن جەتكىزىلىپ تۇرۋىنا مۇددەلى. ويتكەنى، سوڭعى ۋاقىتتا ولاردىڭ نارىعىندا وسى ءونىمدى تۇتىنۋ ارتىپ وتىر. سونىمەن قاتار، قازاقستاندىق ءونىم ءوزىنىڭ دامدىك ساپاسىمەن، تازالىعىمەن، ەكولوگيالىق قۇنارلىلىعىمەن ەرەكشە. سول ءۇشىن دە قىتايدا قازاقستاننىڭ مايى پرەميۋم-كلاسسقا جاتادى، باعاسى دا 10-15 پايىزعا جوعارى. سونىمەن قاتار، قىتايلىق كومپانيالار وزدەرىنىڭ ءوندىرىسىن قازاقستاندا ۇيىمداستىرۋعا دا قىزىعۋشىلىق تانىتادى. ماسەلەن، بيىل ولار سولتۇستىك قازاقستان وبلىسىنان راپس مايىن وندىرەتىن زاۋىت سالۋدى باستاپ، كەلەسى جىلى ونىڭ ءونىمىن ءوز نارىقتارىنا ساتۋعا قىزىعىپ وتىر»، - دەيدى ە. ەسەنەيەۆ.
