ب. ەسەنتايەۆا «قازاق ارۋى» بايقاۋىنا قاي ءوڭىردىڭ قىزدارى قاتىسۋعا نيەت تانىتا بەرمەيتىنىن ايتتى

استانا. قازاقپارات - مەملەكەتتىك ءتىل ءبىلۋدى ەرەكشە ەسكەرەتىن «قازاق ارۋى» بايقاۋىنىڭ ىرىكتەۋ تۋرىنا ورال مەن پەتروپاۆلدىڭ ارۋلارى كەلگەن جوق.

بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە «قازاق ارۋى» بايقاۋىنىڭ باس پروديۋسەرى بايان ەسەنتايەۆا ءمالىم ەتتى.

سوندىقتان اتالعان بايقاۋدا سولتۇستىك قازاقستان جانە باتىس قازاقستان وبلىستارىنىڭ وكىلدەرى بولمايدى.

«مەن قازاقستاننىڭ سولتۇستىك وڭىرلەرىندە تۇراتىن ءبىزدىڭ ارۋلارىمىزدى ءسال بەلسەندىرەك بولۋعا شاقىرامىن. جىل سايىن وسى ماسەلە الدىمىزدان شىعا بەردى. ارۋلارىمىز بايقاۋعا قاتىسۋعا نيەت تانىتا بەرمەيدى. اسىرەسە پەتروپاۆل ارۋلارى. وكىنىشكە وراي، مەنىڭ تۋعان قالام ورال دا بەلسەندى ەمەس. سول سەبەپتى وسى وبلىستاردىڭ نامىسىن قورعايتىن ەشكىم جوق. سولتۇستىك پەن باتىستى بەلسەندىرەك بولۋعا شاقىرامىن»، - دەدى ب. ەسەنتايەۆا.

ەڭ بەلسەندى وڭىرلەر: وڭتۇستىك قازاقستان وبلىسى، اقمولا جانە قاراعاندى وبلىستارى. جالپى فينالدىق كەزەڭگە 21 قاتىسۋشى ءوتىپ وتىر.

«بىزدە فينالعا شىعاتىن قىزداردىڭ سانى شەكتەۋلى ەمەس. مىسالى، بىلتىر 26 قاتىسۋشى وتكەن ەدى. بۇل ءبىزدىڭ بايقاۋدىڭ رەكوردى بولاتىن. ارۋلاردىڭ كوپتىگى سونشالىق - ولاردىڭ بارلىعىن كورسەتكىمىز كەلدى. بيىل ارۋلارىمىزدىڭ سانى 21»، - دەپ اتاپ ءوتتى پروديۋسەر.

ايتا كەتەيىك، بايقاۋدىڭ اقتىق سىنى ەرتەڭ، 16 -ناۋرىزدا، استاناداعى كونگرەسس حولل سارايىندا وتەدى. ارۋلار اجارىمەن عانا ەمەس، سونىمەن قاتار قازاق ءتىلى ءبىلىمى دە سىنالاتىن بولادى. سونداي- اق ولاردىڭ ءارقايسىسى قازاق ءداستۇرىن، تاريحىن، ادەبيەتىن جانە قازاق حالقىنىڭ ادەت- عۇرىپتارىن ءبىلۋى ءتيىس.

ەسكە سالا كەتسەك، «قازاق ارۋى» بايقاۋى بيىل التىنشى رەت وتكىزىلۋدە.

اۆتور: جاسۇلان جولدىبايەۆ