سەمەي اكىمى حالىقتان كەشىرىم سۇرادى
قالا باسشىسى ەرماك ءسالىموۆ سۋ استىندا قالعان كوشەلەردە بولىپ قايتتى. اكىم قالالىق تۇكق ءبولىمىنىڭ باسشىلىعىن جاۋاپقا تارتتى. «سوزبەن ءبارىن قاتىراسىڭدار، ال كورىپ وتىرعانىمىز مىناۋ. ءبىرىنشى تاپسىرما - بارلىق ترانسپورتتى وسى جۇمىسقا جۇمىلدىرىڭدار»، - دەدى ەرماك ءسالىموۆ ت ۇ ك ق ءبولىمىنىڭ باسشىسى قىزمەتىن اتقارۋشى نۇرلان سەرعازينوۆكە قاراپ.
«مەن ازاماتتاردىڭ الدىندا وسىنداي سالعىرت جۇمىس ءۇشىن كەشىرىم سۇرايمىن. ءبىز بۇدان ناتيجە شىعارامىز»، - دەدى اكىم.
تەكسەرۋ بارىسىندا ءسالىموۆ كوشەنى سۋدان تازارتاتىن ارنايى تەحنيكانىڭ جۇمىسقا كەش شىعىپ، ەرتە كەتىپ قالاتىنىن انىقتادى. «مۇنىڭ بارلىعى تۇرعىن ءۇي- كوممۋنالدىق ءبولىمنىڭ بۇل ىسپەن سالعىرت اينالىسۋىنان بولىپ وتىر. تاڭەرتەڭ شىعاتىن تەحنيكا جۇمىس ىستەمەيدى. ساعات 9-10 دا عانا شىعادى - بۇل دۇرىس ەمەس. سوندىقتان دا ءبىز قوسىمشا كۇش ءبولىپ، قاتاڭ باقىلاۋعا الۋ شاراسىن قولدانامىز. جۇمىس كەستەسىن جاساپ قويدىق»، - دەدى اكىم.
قالا باسشىسى 13 ارنايى تەحنيكاعا تاعى 10 تەحنيكا قوسۋدى تاپسىردى. سونىمەن قاتار، ول كارىز جۇيەسىن قالپىنا كەلتىرۋگە بيۋدجەتتەن قاراجات بولىنگەنىن جەتكىزدى. «مۇنى از قاراجات قۇيۋ ارقىلى قالپىنا كەلتىرۋگە ارنالعان تەحنولوگيالار بار. سول ارقىلى كارىز جۇيەسىن قالپىنا كەلتىرۋگە بولادى. مۇنىمەن اينالىساتىن كومپانيادا، وعان بولىنگەن قاراجات تا بار. مۇنداي جاعداي جاڭبىر كەزىندە قايتالانادى. سۋ تاسقىنىنىڭ نەگىزگى سەبەبى - قار، ال جاڭبىر ونى جۇزەگە اسىراتىن فاكتور. سوندىقتان دا قاردى تەزىرەك شىعارۋ كەرەك. ءبىز بولاشاقتا مۇنى ەسەپكە الامىز»، - دەدى ەرماك ءسالىموۆ.
ەسكە سالايىق، سەمەيدە قاردىڭ جىلدام ەرۋىنەن كەيبىر كوشەلەر مەن جولدار سۋ استىندا قالعان ەدى.
