دارىگەرلەر سپورتشىلاردى توكپەن ۇرۋدى ۇسىندى

استانا. قازاقپارات - سان- فرانسيسكوداعى Halo Neuroscience ەمحاناسىنىڭ دارىگەرلەرى ەلەكتر توگىنىڭ سپورتشىلار ءۇشىن دوپينگتىڭ رۇقسات ەتىلگەن ءتۇرى بولۋى مۇمكىن ەكەنىن مالىمدەدى، - دەپ حابارلايدى "ۆەستي. Ru".

زەرتتەۋ ناتيجەسىندە توك ارقىلى ميعا اسەر ەتە وتىرىپ، سپورتشىنىڭ شارشاعانىن سەزىنۋىن ازايتۋعا بولاتىنى انىقتالدى. دارىگەرلەردىڭ ايتۋىنشا، مۇنداي ءادىس جاراقات العاننان كەيىن دەنساۋلىقتى قايتا قالپىنا كەلتىرۋگە جانە باسەكەلەستەردىڭ قاسىندا "مي دوپينگىن" قامتاماسىز ەتۋگە كومەكتەسەدى.

زەرتتەۋ كەزىندە ءادىس جەتى سپورتشىعا قولدانىلدى. ەكى اپتا بويى شاڭعىشىلار ترامپليننەن سەكىردى، ولاردىڭ تورتەۋى جاتتىعۋ كەزىندە ترانسكرانيالدىك ميكروپولياريزاتسيا الدى. ناتيجەسىندە توك العان سپورتشىلاردىڭ كۇشى 70 پايىزعا، ال كوورديناتسياسى 80 پايىزعا ءوستى.

دەگەنمەن بۇل ناتيجە ازىرشە جاڭا تەحنولوگيانىڭ تيىمدىلىگىن تولىقتاي كورسەتپەيدى. سەبەبى، ءادىس تەك از ادامعا جاسالدى. سونىمەن قاتار، ادامداردىڭ ميدى ىنتالاندىرۋعا ءارقالاي رەاكسيا كورسەتەتىنى بەلگىلى.