قازاقستان مەن قىتاي يننوۆاتسيا سالاسىنداعى ءوزارا ىنتىماقتاستىقتى كۇشەيتەدى

الماتى. قازاقپارات - الماتى اكىمدىگىندە قىتاي حالىق رەسپۋبليكاسى حۋبەي پروۆينتسياسىنىڭ ۆيتسە- گۋبەرناتورى گان جۋنكۋن باستاعان دەلەگاتسيامەن كەزدەسۋ ءوتتى.

بۇل تۋرالى بۇگىن الماتى قالاسى اكىمىنىڭ باسپا ءسوز قىزمەتىنەن حابارلادى.

كەزدەسۋ بارىسىندا تاراپتار ونەركاسىپ، ساۋدا، يننوۆاتسيا، مادەنيەت جانە ءبىلىم سالالارىندا ەكىجاقتى ىنتىماقتاستىقتىڭ الەۋەتى ۇلكەن ەكەندىگىن اتاپ ءوتتى.

سونداي-اق، الماتى اكىمدىگىنىڭ باسشىلىعى قازاقستان مەن قىتاي اراسىنداعى قارىم-قاتىناس تۇراقتى سيپاتقا يە ەكەنىن جەتكىزدى.

ايتا كەتەلىك، بۇگىنگى تاڭدا تەك الماتى قالاسىنىڭ وزىندە 69 بىرلەسكەن جانە قىتايلىق كاپيتالدىڭ قاتىسۋىمەن 170 تەن استام استام كاسىپورىن جۇمىس ىستەيدى.

وسى كومپانيالاردىڭ قىزمەتى ارقاسىندا الماتى مەن قىتاي اراسىنداعى تاۋار اينالىمى 2016-جىلدىڭ قاڭتار ايىندا 100 ميلليون ا ق ش دوللارىنا جەتتى.

ءوز كەزەگىندە گان جۋنكۋن مىرزا حۋبەي پروۆينتسياسىنىڭ ورتالىعى - ۋحان قالاسىنان قازاقستانعا جانە قازاقستان ارقىلى ەۋروپا ەلدەرىنە تاۋارلىق پويىزداردىڭ قاتىناۋى ەكى ەل اراسىنداعى ىنتىماقتاستىقتى دامىتۋعا سەپتىگىن تيگىزەتىندىگىن اتاپ ءوتتى.

بۇدان باسقا، ىنتىماقتاستىق ماسەلەسىن تالقىلاي كەلە، قىتايلىق دەلەگاتسيا جاڭا تەحنولوگيالار سالاسىنداعى ىنتىماقتاستىققا ەرەكشە توقتالدى.

مىسالى، قىتاي ۇكىمەتى 1991-جىلى جوعارى تەحنولوگيانى دامىتۋ ماقساتىندا بۇكىل ەلدە جوعارى تەحنولوگيالار پاركىن قۇرۋ تۋرالى شەشىم قابىلداعان. ال بۇگىندە قىتايدا مۇنداي پاركتەردىڭ سانى - 130 عا جەتتى. سوندىقتان، قىتايلىق دەلەگاتسيا الماتى اكىمدىگىنىڭ باسشىلىعىنا يننوۆاتسيا سالاسىنداعى ىنتىماقتاستىقتى كۇشەيتۋدى ۇسىندى.

كەزدەسۋ سوڭىندا الماتى اكىمدىگىنىڭ باسشىلىعى قىتايلىق دەلەگاتسيانى الماتى قالاسىنىڭ 1000 جىلدىعىن مەرەكەلەۋ شارالارىنا جانە 2017-جىلى الماتىدا وتەتىن قىسقى ۋنيۆەرسيادا ويىندارىن تاماشالاۋعا شاقىردى.

اۆتور: ايبوتا جاپپاربەرگەن