ن. نازاربايەۆ ازەربايجان پرەزيدەنتى ي. اليەۆتىڭ رەسمي ساپارمەن كەلۋ تۋرالى شاقىرۋىن قابىل الدى
بۇل تۋرالى بۇگىن اقوردادا ءبىرقاتار شەت ەل ەلشىسىنەن سەنىم گراموتاسىن قابىلداعان ەلباسى نۇرسۇلتان نازاربايەۆ ايتتى.
«ازەربايجان - قازاقستان ءۇشىن كاۆكاز وڭىرىندەگى ستراتەگيالىق سەرىكتەس. ءبىزدىڭ ەلدەرىمىز ەنەرگەتيكا، ترانزيت، كولىك، اۋىل شارۋاشىلىعى، تۋريزم، ءبىلىم بەرۋ سالاسىندا، باسقا دا باعىتتار بويىنشا بەلسەندى ىنتىماقتاسىپ كەلەدى»، - دەدى ن. نازاربايەۆ.
سونىمەن قاتار، ق ر پرەزيدەنتى جاقىندا عانا ازەربايجان پرەزيدەنتى يلحام اليەۆتەن ازەربايجانعا رەسمي ساپارمەن كەلۋگە شاقىرۋىن قابىل العانىن اتاپ ءوتتى.
«مەن بۇل شاقىرۋدى ىقىلاسپەن قابىل الدىم، ديپلوماتيالىق ارنالار ارقىلى ناقتى مەرزىمىن كەلىسەتىن بولامىز»، - دەدى ەلباسى.
ايتا كەتەيىك، بۇگىن اقوردادا ق ر پرەزيدەنتىنە ب ۇ ۇ دامۋ باعدارلاماسىنىڭ قازاقستانداعى تۇراقتى وكىلى، ب ۇ ۇ- نىڭ تۇراقتى ۇيلەستىرۋشىسى نوريماسا شيمومۋرا، يزرايل ەلشىسى ميحايل برودسكي، وزبەكستان ەلشىسى يكروم نازاروۆ، ازەربايجان ەلشىسى راشاد ماممادوۆ، تايلاند ەلشىسى نات پينوۆاتتاناچيپ سەنىم گراموتاسىن تابىس ەتكەن بولاتىن.
اۆتور: مارلان جيەمباي
