10:08, 15 - ناۋرىز 2016 | GMT +5
رەسەي سيريادان اسكەر شىعارۋدى باستادى
استانا. قازاقپارات - سيريا پرەزيدەنتى اكىمشىلىگىنىڭ مالىمدەۋىنشە، رەسەيدىڭ سيريادان نەگىزگى اسكەر كۇشىن شىعارۋ تۋرالى شەشىمى ەلدەر اراسىندا كەلىسپەۋشىلىك تۋىندادى دەگەندى بىلدىرمەيدى، دەپ حابارلادى «ВВС» اگەنتتىگى.
«ماسكەۋدىڭ بۇل قادامى داماسكىمەن كەلىسىلدى جانە ءبىراز ۋاقىت ەگجەي- تەگجەيلى زەردەلەندى»، - دەلىنگەن «فەيسبۋك» الەۋمەتتىك جەلىسىندەگى باشار اساد اكىمشىلىگىنىڭ پاراقشاسىندا.
دۇيسەنبى كەشكە ۆلاديمير پۋتين سىرتقى ىستەر ءمينيسترى سەرگەي لاۆروۆ جانە قورعانىس ءمينيسترى سەرگەي شويگۋمەن كەزدەسۋدە رەسەي اسكەرى قويىلعان مىندەتتەردى ورىنداعاندىقتان وسىنداي شەشىم قابىلدانعانىن ايتىپ، سيريادان نەگىزگى اسكەري كۇشتەردى شىعارۋدى بۇيىردى.
اسكەردى شىعارۋ 15 - ناۋرىزدا باستالدى.
سونىمەن بىرگە، سيريا قورعانىس مينيسترلىگى ماسكەۋدىڭ اسكەر سانىن ازايتۋ شەشىمى سيريادا كەي باعىتتاردا ايقاس اياقتالعاننان كەيىن ەكى تاراپ اراسىنداعى جاعدايدى ۇيلەستىرۋ ءۇشىن قابىلداعانىن راستادى، دەپ مالىمدەدى رەيتەر.
