08:16, 15 - ناۋرىز 2016 | GMT +5
جاپونيادا تۋريستەردى قىزىقتىرۋ ءۇشىن نيندزيا قىزمەتىن اشتى
استانا. قازاقپارات - حونسيۋ ارالىنداعى ايتي پرەفەكتۋراسىندا مەملەكەتتىك قىزمەتتە تۇراقتى ىستەيتىن التى نيندزيا قىزمەتكەرىن ىزدەستىرىپ جاتىر. ولار ءتۇرلى شارالارعا جانە تۋريستەردى قىزىقتىراتىن جەرگىلىكتى مادەني قويىلىمدارعا قاتىسۋ مىندەتتتەلەدى، دەپ حابارلايدى South China Morning Post.
جەرگىلىكتى بيلىكتىڭ حابارلاماسىندا جاۋىنگەر قىزمەتىنە ۇمىتكەرلەر دەنە دايىندىعى جوعارى دەڭگەيدە، ءارى اكروباتتىق ماشىعى بولۋى ءتيىس. ءبىر قىزىعى شايقاسقا قاتىسقاندار بۇل لاۋازىمعا ساي ەمەس دەلىنگەن.
سىناقتان وتكەن التى نيندزيا تۇراقتى ءارى تولىق جۇمىس كۇنى بويىنشا قىزمەت ەتەدى. ولاردىڭ ايلىق جالاقىسى 1600 دوللار شاماسىندا بولادى. بۇل قارجى تەك قانا اكروباتتتىق تاسىلدەردى كورسەتۋ عانا ەمەس، پرەفەكتۋرانى جارنامالاۋ جانە راديو- تەلە باعدارلامالارعا قاتىسقانى ءۇشىن بەرىلەدى.
XV عاسىردا جاپونيادا نيندزيالار بارلاۋشى- ديۆەرسانت، جانسىز نەمەسە جالدامالى كىسى ءولتىرۋشى بولعان. اڭىزعا سەنسەك، ولار بالا شاعىنان نيندزيۋتسۋ اتتى وتە قيىن جاۋىنگەرلىك ونەردى مەڭگەرگەن.
